रूपन्देही । अविरल वर्षासँगै आएको बाढीले रूपन्देही र पर्वतमा ११ घर बगाएको छ । बाढीका कारण नदी आसपासका बस्तीसमेत उच्च जोखिममा परेका छन् ।
रूपन्देहीको बुटवल उपमहानगरपालिका–११ स्थित टपमझुवा क्षेत्रमा तिनाउ नदीमा आएको बाढीले दुई पक्की र चार कच्ची गरी ६ घर बगाएको छ ।
- ADVERTISEMENT -
जिल्ला प्रहरी कार्यालयका प्रमुख जनकबहादुर शाहीका अनुसार बाढीले घरसँगै घरभित्र रहेका सरसामानसमेत बगाएको छ । घटनामा मानवीय क्षति भने भएको छैन ।
बाढीको जोखिममा रहेका परिवारलाई सुरक्षित स्थानमा स्थानान्तरण गर्न सुरक्षाकर्मी परिचालन गरिएको प्रहरीले जनाएको छ । लगातार वर्षा भइरहेकाले तिनाउ आसपासका बस्तीमा थप जोखिम बढ्न सक्ने भन्दै स्थानीयवासीलाई सतर्क रहन आग्रह गरिएको छ ।
- ADVERTISEMENT -
यस्तै, पर्वतको जलजला गाउँपालिका–८ स्थित फर्से र लस्ती बजारमा कालीगण्डकी नदीको बाढीले पाँच घर बगाएको छ ।
गाउँपालिका अध्यक्ष राजु आचार्यका अनुसार बाढीको जोखिममा रहेका बस्तीका स्थानीयवासीलाई सुरक्षित स्थानमा सारिएको छ । कालीगण्डकीमा जलसतह बढेसँगै नदी आसपासका क्षेत्रमा कटानसमेत भइरहेको छ ।
गएरातिदेखि कालीगण्डकीमा जलसतह बढेपछि म्याग्दी, पर्वत र बागलुङका तटीय क्षेत्रमा बाढी तथा कटानको जोखिम बढेको छ । नदी आसपासका बस्तीमा जोखिम बढेसँगै स्थानीयवासीमा त्राससमेत बढेको छ ।
प्रहरी तथा स्थानीय तहले नदी किनार तथा जोखिमयुक्त क्षेत्रमा रहेका सर्वसाधारणलाई सतर्क रहन र सुरक्षित स्थानमा जान आग्रह गरेका छन् ।
