शनिबारै दोस्रो पटक थप ३६, संक्रमित पुग्यो ५८४ जना

काठमाडौं । विश्वव्यापी रुपमा फैलिरहेको कोरोना भाइरस पछिल्ला दिन नेपालमा संक्रमण हुनेको संख्या बढ्दै गएको छ । शनिबारै दोस्रो पटक ३६ जना नयाँ संक्रमित फेला परेको स्वास्थ्य तथा जनसंख्या मन्त्रालयले जनाएको छ ।
मन्त्रालयमा आज शनिबार आयोजित नियमित पत्रकार सम्मेलनमा दिइएको जानकारीअनुसार सबैभन्दा धेरै बाँकेको नरैनापुरका २७ जना कोरोना संक्रमित फेला परेका छन् । योसँगै नेपालमा कोरोना संक्रमितको सङ्ख्या ५८४ पुगेको छ ।
मन्त्रालयका प्रवक्ता डा विकास देवकोटाका अनुसार बाँकेमा २७, बैतडीमा चार, सुर्खेतमा तीन, बर्दिया र झापामा एक÷एक जनामा कोरोना सङ्क्रमण पुष्टि भएको छ । बैतडीको शिवनाथ गाउँपालिका, बर्दियाको बढैयाताल गाउँपालिका, झापाको झापा गाउँपालिकामा संक्रमित भेटिएका हुन् । यस्तै सुर्खेतको सुर्खेत अस्पतालमा गरिएको परीक्षणमा थप तीन जनामा संक्रमण भएको पुष्टि भएको हो ।
हालसम्म कूल ४० जिल्लामा कोरोना संक्रमित भएका छन् । मन्त्रालयका अनुसार प्रदेश नं १ मा ८६, प्रदेश नं २ मा १७२, वाग्मती प्रदेशमा ३२ जना संक्रमित भएका छन् । यस्तै गण्डकी प्रदेशमा पाँच, प्रदेश नं ५ मा २७१, कर्णाली प्रदेशमा चार र सुदूरपश्चिम प्रदेशमा १४ जना संक्रमित भएका छन् ।