पूर्वसांसद रानाभाटको उपचारका क्रममा निधन

0
25

चितवन / पूर्ब सांसद एकनाथ रानाभाटको आज निधन भएको छ । चितवन मेडीकल कलेजमा उपचारका क्रममा दिउँसो १ वजेर ५८ मिनेटमा उहाँको निधन भएको हो । उच्च रक्तचापका कारण मस्तिश्कघात भई १६ दिन देखि उहाँको कलेजमा उपचार भइरहेको थियो ।
रत्ननगर नगरपालिका वडा नम्बर १४ पिठूवा निवासी रानाभाट वि. सं. २०५६ सालमा चितवन क्षेत्र नम्बर २ वाट प्रतिनिधि सभामा निर्वाचित हुनुभएको थियो । नेपाली काङ्ग्रेस रत्ननगरका सभापति रुपनराज घिमिरेका अनुसार वि. सं. २००९ साल कात्तिक २८ गते स्याङ्जाको भाटखोलामा उहाँको जन्म भएको थियो ।
रानाभाट नेपाली काङ्ग्रेस चितवनका पूर्ब सचिब, सुकुम्बासी समस्या समाधान आयोग रुपन्देहीका पूर्ब अध्यक्ष, राष्ट्रिय सहकारी वोडका पूर्ब उपाध्यक्ष लगाएत बिभिन्न पदमा रहि कार्य गर्नु भएको थियो । उहाँका श्रीमती, एक छोरा र एक छोरी रहेका छन् । उहाँको मंगलबार बिहान पबित्र तिर्थस्थल देवघाटमा अन्त्यष्ठि गरिदैं छ ।
नेपाली काङ्ग्रेस चितवनले शोक वक्तव्य जारी गर्दै पार्टीले एक निष्ठावान नेता गुमाएकोमा दुःख प्रकट गरेको छ । जिल्ला सभापति जीतनारायण श्रेष्ठले उहाँको निधनले सिंगो काङ्ग्रेसलाई अपुरणीय क्षती पुगेको वताउनुभयो । उहाँका अनुसार बिहान ८ः३० वजे देखि एक घण्टा उहाँको शवलाई पार्टी कार्यालय नारायणगढमा राखिने छ ।रासस