एक हजार परिवारलाई खाद्यान्न सहयोग, सरकार मौन बसेको आरोप

मकवानपुर / सरकारले कोरोना भाइरस तथा रोकथाम नियन्त्रणका लागि देशभर लागू गरिएको निषेधाज्ञाका कारण दैनिक ज्यालादारी गरी आफ्नो दैनिकी चलाउने विपन्न घर परिवारको जीवन दिनप्रतिदिन कष्टकर हुँदै गएको छ । देशका विभिन्न ठाउँहरुमा सहयोगी संघसंस्था, व्यक्तिलगायतले विपन्न परिवारलाई राहतहरु वितरण गर्दै आइरहेको छ भने सरकार मुकदर्शक मात्र भएको जनस्तरबाट चर्को विरोध आएको सर्वविदितै छ ।
यसैबीच राक्सिराङ गाउँपालिकाका एक हजार चेपाङ परिवारलाई खाद्यान्न सहयोग प्राप्त भएको छ । नेपाली कांग्रेस मकवानपुरले एक हजार परिवारलाई बिहीबार खाद्यान्न सहयोग गरेका छन् । हेटौंडामा बागमती प्रदेशका नेपाली कांग्रेस संसदीय दलका नेता तथा मकवानपुरका सभापति इन्द्रबहादुर बानियाँ र केन्द्रीय सदस्य महालक्ष्मी डिना उपाध्यायले उक्त खाद्यान्न सहयोग गरेका हुन् ।
कांग्रेस नेता बानियाँले राक्सिराङका चेपाङ मात्र नभई देशभरका जनता रोग र भोकका कारण समस्यामा परेको बेला सरकार मौन बसेको आरोप लगाए । जनताहरु रोगका कारण डरले भोक–भोकै घरभित्र थुनिन बाध्य रहेको र सरकार कानमा तेल हालेर बसिरहेको उनको भनाइ थियो ।
अहिलेको विषम परिस्थिति दैनिक ज्यालादारी मजदुर तथा दीनदुखीको अवस्थामा सरकारले चासो नदिदाँ कांग्रेस मकवानपुरले चुनौती दिँदै खाद्यान्न सहयोग गरिरहेको उनले भने ।