‘घरभाडा साविककै दिन दबाब दिने घरधनीलाई कानुनी उपचार’

भरतपुर । नेपाल घरबहाल उपभोक्ता मञ्च चितवन र वस्तुगत संघको बैठकले घरभाडा नतिर्न व्यवसायीलाई आग्रह गरेको छ । चितवनका व्यवसायीलाई लकडाउन अवधिको घरभाडा ५० प्रतिशत मात्र बुझाउन मञ्च चितवन र संघले आग्रह गरेको हो ।
मञ्चका महासचिव रामप्रसाद पौडेलले पहिलेको अवस्थामा व्यवसाय सञ्चालन नआउँदासम्म ५० प्रतिशतभन्दा बढी भाडा नलिन घरधनीलाई अनुरोध गर्ने निर्णय गरेको जानकारी दिए ।
हालको विषम परिस्थितिमा सबै किसिमका व्यवसाय ठप्प भएकाले व्यवसायीहरुलाई घरधनीले छुट दिनुपर्ने मञ्चका सल्लाहकार प्रभात ढुंगानाले बताए । ‘व्यवसायीहरु आर्थिक संकटमा परेका छन्, उनले भने, ‘यो बेला भाडा तिर्न सक्ने अवस्था छैन ।’
उनका अनुसार घरधनीले ५० प्रतिशतभन्दा बढी भाडा लिइएको पाइए आन्दोलनमा उत्रने बताए । साविककै भाडा दिन दबाब दिने घरधनीलाई सूचना संकलन गरी कानुनी उपचारमा जाने उनको भनाइ छ ।