ओली पक्षलाई स्पष्टिकरण दिन जरुरी नभएको निश्कर्ष

0
86

काठमाडौं । नेकपा एमालेको केपी ओली पक्षले सोधेको स्पष्टिकरणको जवाफ माधव नेपाल पक्षले नदिने भएको छ ।
सोमबार बसेको एमाले केन्द्रीय समिति बैठकले पार्टीको ह्वीप उल्लङ्घन गरेर प्रधानमन्त्री शेरबहादुर देउवालाई विश्वासको मत दिएका २२ सांसदलाई २४ घण्टे स्पष्टीकरण सोध्ने निर्णय गरेको थियो ।
एमालेको उक्त निर्णयपछि माधव पक्षको छलफल भएको थियो । छलफलमा ओली पक्षलाई स्पष्टिकरण दिन जरुरी नभएको निश्कर्ष निकाल्दै माधव पक्षले स्पष्टिकरण नदिने जनाएको हो ।
माधव पक्षले पार्टी विवादका कारण आधिकारीक एमाले कुन पक्ष हो भन्ने एकिन नभएकोले एकले अर्कोलाई मान्यता नदिई समूह चलाइरहेको अवस्थामा स्पष्टिकरण दिन जरुरी नभएको बताए ।
ललितपुरस्थित तुलसीलाल अमात्य प्रतिष्ठानमा बसेको एमाले बैठकमा अध्यक्ष ओलीले एमालेका सांसदहरूले देउवालाई विश्वासको मत दिएर शर्मनाक र लज्जास्पद चरित्र देखाएको बताएका थिए ।
अध्यक्ष ओलीले देउवालाई भोट हाल्ने २२ जना नेता एमालेमा नफर्कने निष्कर्ष सुनाउँदै उनीहरूबिनै एमाले पार्टी चल्ने सङ्केत गरेका थिए ।
सोमबारै जारी केन्द्रीय कमिटी बैठक रोकेर अध्यक्ष ओलीको निजी निवास बालकोटमा स्थायी समिति बैठक बसेको थियो । उक्त बैठकमा देउवालाई भोट हाल्ने २२ जनालाई कस्तो कारबाही गर्ने भन्नेबारे छलफल भएको थियो ।