रत्ननगर रेडक्रसद्धारा एम्बुलेन्स सेवा सञ्चालन

चितवन / चितवनको रत्ननगरमा चन्दा संकलन गरी एम्बुलेन्स सेवा सञ्चालनमा ल्याइएको छ । नेपाल रेडक्रस सोसाइटी उपशाखा रत्ननगरले विभिन्न संघसंस्था,रेडक्रसकर्मी तथा सहयोगीदाताहरुसंग चन्दा संकलन गरी विहीवार देखि एम्बुलेन्स सञ्चालनमा ल्याएको हो ।
एम्बुलेन्स खरिदका लागि रत्ननगर खानेपानी तथा सरसफाई उपभोक्ता संस्थाले ६ लाख रुपैया सहयोग गरेको छ । त्यसैगरी रत्ननगर नगरपालिका वडा नं १,३,८,वडा नं २ का युवाहरु,रेडक्रसकर्मीहरुले एम्बुलेन्स खरिदका लागि आर्थिक सहयोग गरेको उपशाखा सचिव रामचन्द्र पौडेलले जानकारी दिए । एम्बुलेन्स खरिदको लागि रेडक्रसले जनआन्दोलनमा घाइते भएकाहरुको उपचारको लागि संकलन गरेको रकम र दैविक प्रकोप उद्दार तथा व्यवस्थापन समितिको खातामा रहेको रकम समेत प्रयोग गरिएको छ ।
एम्बुलेन्स खरिदका लागि आर्थिक संकलन अभियान नै चलाइएको थियो । जनआन्दोलनका घाइतेको उपचार गरेर बाँकी रहेको एक लाख बढी रकम एम्बुलेन्स खरिदका लागि प्रयोग गरिएको सचिव पौडेलले बताए । विहीवार नेपाल रेडक्रस सोसाइटी चितवनका सभापति ज्ञानशाली न्यौपाने,वडा नं २ का अध्यक्ष तिलकराज शर्मा,खानेपानीका अध्यक्ष भीष्मराज पौडेलले सयुक्त रुपमा एम्बुलेन्स सेवाको उद्घाटन गरेका हुन । उपसभापति अनु गौतमले स्वागत मन्तव्य राखेको सो कार्यक्रममा कोषाध्यक्ष युवराज आचार्यले आयव्यायको बारेमा जानकारी गराएका थिए ।