जन्मदिनमा आश्रमलाई कपडा धुने मेसीन र खाद्यान्न सहयोग

ठोरी / ठोरी–१ मा स्थित बृद्ध–बृद्धा तथा असहाय आश्रमलाई कपडा धुने मेसिन र खाघान्न सहयोग प्राप्त भएको छ । सोही ठाउँ निवासी सुदीप थापाले आफ्नो बुबा भरतबहादुर थापा र छोरा रोजदिप थापाको जन्मोत्सवको अवसर पारेर उक्त सहयोग सामाग्री हस्तान्तरण गरेका हुन् ।
थापाले बृद्ध आश्रमका अशक्तहरुलाई कपडा धुन र खाना पकाउन समस्या रहेको जानकारी पाएपछि सो सहयोग गरेको बताए ।
ठोरी–१ का वडाध्यक्ष रामप्रकाश कुवँरले अशक्तको आश्रममा विभिन्न तवरबाट सहयोग हुनु सह्रानीय विषय रहेको बताउँदै संस्थाको दीर्घकालिन हित र संरक्षणका लागि पटक पटक सम्बन्धित निकायमा प्रस्ताव लगेको जानकारी गराए ।
कार्यक्रममा बृद्धबृद्धा तथा असहाय आश्रमका संचालक आशबहादुर गुरुङले संस्थालाई कसरी अगाडि बढाउने भन्ने चिन्ता बढ्दै गएको बताए । हाल आश्रममा विभिन्न उमेर समूहका २० जनाभन्दा बढी अशक्त व्यक्ति रहेको उनले जानकारी दिए ।