चितवनका पत्रकारहरुसँग स्थानीय तह निर्वाचनसम्बन्धी अन्तरक्रिया

चितवन / नेपाल पत्रकार महासंघ चितवनले पत्रकारहरुसँग स्थानीय तह निर्वाचनसम्बन्धी अन्तक्र्रिया गरेको छ । महासंघको आयोजनामा स्थानीय तह निर्वाचनसम्बन्धी पत्रकारहरुले पालना गर्नुपर्ने आचारसंहिताबारे बिहीबार अन्तक्र्रिया गरेको हो ।
कार्यक्रममा बोल्दै चितवनका मुख्य निर्वाचन अधिकृत प्रकाशकुमार अधिकारीले सत्यतथ्य समाचार लेख्न पत्रकारलाई आग्रह गरे । पत्रकार कुनै प्रलोभनन नपरी, सत्यतथ्य समाचार लेखनमा जोड दिनुपर्ने उनको भनाइ थियो ।
पत्रकारको आचारसंहिता नै नैतिकताको मुख्य आधार भएकोले आत्मसाथ गर्नुपर्ने उनले जिकिर गरे । आचारसंहिता उल्लंघन गर्नेलाई कारबाही, दण्ड, जरिवानाको व्यवस्था हुनुपर्ने उनको भनाइ थियो ।
नेपाल पत्रकार महासंघका केन्द्रीय अध्यक्ष विपुल पोख्रेलले विधानमा नभएको व्यवस्था टेकेर राजनीतिमा लाग्ने पत्रकारलाई कारबाही हुने बताए । उनले पत्रकार महासंघमा शुद्धिकरण र विधानमा जुन प्रावधान छन् त्यसलाई स्पष्ट बनाउनुपर्नेे बेला आएको बताए ।
चितवन निर्वाचन कार्यालय प्रमुख भीमसेन कार्कीले आचारसंहिता उलंघन गर्ने कुनै पनि दललाई २५ हजार देखि एक लाख सम्मको जरिवानाको व्यवस्था रहेको जानकारी दिए ।
पत्रकार महासंघका केन्द्रीय कोषाध्यक्ष कलेन्द्र सेजुवालले पत्रकार महासंघ आचारसंहिता कार्यान्वयन गर्दै पत्रकारिता क्षेत्रलाई थप मर्यादित बनाउन लागिरहेको बताए ।
नेपाल पत्रकार महासंघ चितवनका अध्यक्ष नारायण अधिकारीले दलीय पार्टी र संगठनलाई प्रोत्साहन हुने पत्रकारले गर्न नहुने बताए । आचारसंहिता उल्लंघनका उजुरी पर्दै आएकाले पत्रकारले मर्यादाभित्र रहेर पत्रकारिता गर्न आग्रह गरे ।
प्रेस युनियनका वरिष्ठ उपाध्यक्ष दिपक अचार्यले पत्रकारिताको आधारभूत मूल्य मान्यता विपरित जाने पत्रकारहरुलाई संगठनले छुट नदिने बताए ।
यस्तै नारायणी अनलाइनका समाचार सम्पादक मधुसूदन दवाडीले पत्रकारले पत्रकार आचारसंहिता–२०७३ पालना गरे निर्वाचन आचारसंहिता पालनाको आवश्यक्ता नरहेको जिकिर गरे । पत्रकारलाई मतदानको अधिकार छ तर खुलेर राजनीतिक दलको प्रचारप्रसार गर्ने अधिकार नभएको उनको भनाइ थियो ।
कार्यक्रममा कान्तिपुर दैनिकका संवाददाता रमेशकुमार पौडेल, प्रेस युनियन चितवनका अध्यक्ष अनिल ढकाल, प्रेस चौतारीकी केन्द्रीय सदस्य प्रतिमा सिलवाल र क्रान्तिकारी प्रेस संगठनका पत्रकार प्रेम कँडेलले आचारसंहिताको बारेमा टिप्पणी गरेका थिए ।