विभिन्न दुर्घटनामा दुई जनाको मृत्यु

काठमाडौं / तुलसीपुरको मदनआश्रित चोकमा शुक्रबार राति मोटरसाइकल दुर्घटना हुँदा एक जनाको मृत्यु भएको छ । मृत्युहुनेमा तुलसीपुर उपमहानगरपालिका–१७ मजगैं निवासी २४ वर्षका रवि बस्नेत रहेको जिल्ला प्रहरी कार्यालय दाङले जनाएको छ ।
प्रहरीका अनुसार, राति पौने ९ बजे तुलसीपुर उपमहानगरपालिका–६ को मदनआश्रित चोक नजिकै अनियन्त्रित भई रा७प १६२९ नम्बरको मोटरसाइकल पल्टिदा बस्नेत घाइते भएका थिए । घाइते बस्नेतको राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि नेपालगन्ज लैजाँदै गर्दा बाटोमै मृत्यु भएको प्रहरीले जनाएको छ ।
यस्तै कालिकोटमा भीरबाट लडेर एक जनाको ज्यान गएको छ । भीरबाट लडेर तिलागुफा नगरपालिका–७ की अन्दाजी ५९ वर्षीया नयाँ दमाईको ज्यान गएको प्रहरीले जनाएको छ ।
प्रहरीका अनुसार, महावै गाउँपालिका–५ राम्नीमा रहेको छोरीको घरबाट फर्किँदै गर्दा बित्तामोड भिरबाट लडेर उनको ज्यान गएको हो ।