बिक्रमबाबा मेलामा प्लाष्टिकजन्य वस्तुको प्रयोग नगर्न आग्रह

चितवन / चितवन राष्ट्रिय निकुञ्जले बिक्रमबाबा मन्दिरमा आउने भक्तजनहरुलाई प्लाष्टिकजन्य वस्तुको प्रयोग नगर्न अनुरोध गरेको छ । निकुञ्जले यही फागुन ७ गतेबाट सुरु भएको बिक्रमबाबा मेला दर्शन गर्न आउने भक्तजनहरुलाई प्लाष्टिकजन्य वस्तुको प्रयोग नगर्न अनुरोध गरेको हो ।
निकुञ्जका सूचना अधिकारी एवम् सहायक संरक्षण अधिकृत गणेशप्रसाद तिवारीका अनुसार पुजा गर्न आउने भक्तजनहरुलाई प्रवेशद्वारदेखि नै प्लाष्टिकजन्य वस्तुको प्रयोग नगर्न सचेत गराइएको हो ।
उनले भने, “सुरक्षाकर्मीहरुले प्लाष्टिकजन्य वस्तुको प्रयोग नगर्न भक्तजनहरुलाई आग्रह गरेका छन् ।” निकुञ्ज सुरक्षाका लागि खटिएको नेपाली सेना, नेपाल प्रहरी, शशस्त्र प्रहरी र स्वयमसेवकहरुले भक्तजनहरुलाई आग्रह गरेको भनाइ छ ।
प्लाष्टिकजन्य बस्तु पुजा स्थल सम्म लगे पनि बाहिर ल्याएर संरक्षणमा सहयोग गर्न भक्तजनहरुलाई अनुरोध गरिएको उनले बताए । पुजा स्थल संरक्षित क्षेत्र भएकाले सो क्षेत्रको संरक्षण गर्नु सबैको दायित्व हुने हुँदा प्लाष्टिक जन्य बस्तुबाट फोहोर नगरिदिन उनले आग्रह गरे ।
प्लाष्टिक जन्य बस्तु निकुञ्जमा फाल्दा वन्यजन्तुले त्यसलाई खाने र यसको असरले वन र वन्यजन्तुको बृद्धि बिकासमा समस्या आउने उनले बताए । वन्यजन्तुले खाएमा प्लाष्टिक जन्य वस्तुका कारण मृत्यु समेत हुन सक्ने भएकाले यसको प्रयोग नगर्न निकुञ्ज प्रशासनले आग्रह गरेको हो ।
प्लाष्टिक जन्य वस्तुलाई रोक्नका लागि पार्किङ् स्थलदेखि नै निगरानी बढाइएको उनको भनाई छ । योसँगै ठाउँ–ठाउँमा संरक्षण सम्बन्धि सूचना राखिएको र सुरक्षाकर्मी समेत सोही अनुसार परिचालन गरिएको उनले बताए ।
दर्शन गर्न आउने भक्तजनहरुलाई पुलमा व्यवस्थित तरीकाले आवतजावतका लागि समेत स्वयमसेवक परिचालन गरिएको छ । एक तर्फबाट प्रबेश र अर्को तर्फबाट बाहिरीने व्यवस्था मिलाईएको उनले जानकारी दिए । हरेक वर्ष चैते दशैंमा बिक्रमबाबा मेला लाग्ने गर्दछ ।
यो पुजा सुरुवाती समयमा थारु समुदायले मात्रै मनाउने गरेको भए पनि पछिल्लो समयमा सबै समुदायले मनाउने गरेको पाईन्छ । बिक्रमबाबाको पुजा गर्न स्वदेशी तथा बिदेशी गरी दैनिक हजारौ भक्तजनहरु यहाँ आउने गर्दछन् ।