‘तामाङ भाषा प्रशिक्षण’ को आज समापन, सहभागीद्वारा थप गर्नुपर्ने माग

–सन्तोष तामाङ
चितवन । तामाङ पत्रकार संघ जिल्ला शाखा चितवन र भरतपुर महानगरपालिकाको संयुक्त आयोजनामा सञ्चालन भइरहेको सात दिने ‘तामाङ भाषा प्रशिक्षण’ को आज (शुक्रबार) समापन हुँदैछ । गत जेठ २७ गतेदेखि सुरु भएको ‘तामाङ भाषा प्रशिक्षण’ को आज असार १ गते समापन हुने संघका अध्यक्ष बबिलाल तामाङले जानकारी दिए ।
अध्यक्ष तामाङका अनुसार भरतपुर महानगरपालिका उपमेयर चित्रसेन अधिकारीले तालिमको समापन गर्ने कार्यक्रम रहेको छ । तालिममा प्रशिक्षार्थीहरुको उल्लासपूर्ण सहभागिता रहेको उनले बताए ।
संघले तामाङ समुदायको संस्कृति तथा भाषा जगेर्ना गर्ने उद्देश्य लिएर उक्त तालिम संचालन गरेको हो । तामाङ समुदायमा पछिल्लो पुस्ताका हरेक व्यक्ति भाषा विहीन बन्दै गएपछि संघले अभियान नै थालेर उक्त कार्यक्रम गरेको उनको भनाइ छ ।
तालिममा सहभागीहरुले ‘तामाङ भाषा प्रशिक्षण’ को अवधि छोटो भएकोले पुनः थप गर्नुपर्ने माग गरेका छन् । चितवनमा नै पहिलो पटक भएको यो कार्यक्रमले तामाङ समुदायमा भाषा जगेर्ना तथा प्रवद्र्धनमा जोड पुगेको संघले जनाएको छ ।
तालिम भरतपुरस्थित जिल्ला समन्वय समितिको सभा हलमा संचालन भइरहेको छ ।