चेल्सीतिर लम्कदैँ ‘सिल्भा’

लन्डन / फ्रेन्च क्लब पेरिस सेन्ट जर्मेन (पीएसजी) छाडेका भेट्रान ब्राजिलियन डिफेन्डर थियागो सिल्भा इंग्लिस क्लब चेल्सीमा अनुबन्धित भएका छन् । पीएसजीसँग सम्झौता सकिएपछि फ्री एजेन्टमार्फत सिल्भाले चेल्सीसँग एक वर्षको सम्झौता गरेका हुन् । क्लबको चाहनाअनुसार अर्को एक वर्ष सम्झौता थप गर्न पाउने प्रावधान राखिएको छ । च्याम्पियन्स लिगको फाइनलमा बायर्न म्युनिखसँग पराजित भएलगत्तै सिल्भाले चेल्सीसँग अनुबन्ध प्रक्रिया अघि बढाएका थिए ।
अघिल्लो दुई समर ट्रान्सफरमा खेलाडी सरुवामा जान नपाएको चेल्सीले यो सिजन खुलेरै खेलाडी अनुबन्ध गर्दै यो ट्रान्सफर विन्डोमा ४ खेलाडी अनुबन्ध गरिसकेको छ । डच आयाक्सबाट हाकिम जीएच र जर्मन आरबी लाइप्जिगबाट टिमो वेर्नरलाई अनुबन्ध गरेको चेल्सीले यसै साता लेस्टर सिटीका बेन चिलवेल र फ्रान्सेली डिफेन्डर मालांग सारलाई फ्री ट्रान्सफरमा अनुबन्ध गरिसकेको छ ।
चेल्सीसँगको सम्झौता गरेपछि सिल्भाले लाम्पार्डको टोलीमा रहेर खेल्न उत्सुक रहेको बताए । ‘चेल्सीसँग अनुबन्ध हुन पाउँदा एकदम खुसी छु । फ्रान्क लाम्पार्डले बुनिरहेको यस युवा टोलीमा समावेश भएर सफलता हासिल गर्न म तयार छु । म स्टामफर्ड ब्रिजमा खेल्न लालायित छु,’ उनले भने । सिल्भा २०१२ मा इटालियन क्लब एसी मिलानबाट पीएसजी पुगेका थिए । त्यसअघि उनले ब्राजिली क्लब फ्लुमिनेन्सेबाट पनि खेलेका थिए । सिल्भाले पीएसजीबाट ३ सय १३ खेल खेल्दै १७ गोल गरेका छन् । उनले पीएसजीबाट ७ लिग वान, ६ कप डि ला लिग र समान पाँचपटक कप डि फ्रान्स र ट्रफी डेस च्याम्पियन्स जितेका छन् । ब्राजिलको राष्ट्रिय टोलीको समेत कप्तानी गरिसकेका सिल्भाले टोलीका लागि ८९ खेल खेल्दै ७ गोल गरेका छन् ।
ज्लाटन मिलानमै
भेट्रान स्विडिस फरवार्ड ज्लाटन इब्राहिमोभिचले इटालियन क्लब एसी मिलानसँग थप एकवर्षको सम्झौता नवीकरण गरेको छ । मिलान र इब्राहिमोभिचबीच एक वर्षका लागि ७ मिलियन युरो (फिक्स) पारिश्रमिक कुनै पनि बोनस नपाउनेगरी सम्झौता भएको हो । एजेन्ट मिनो राइओलाले ३८ वर्षे इब्राहिमोभिचले मिलानसँग सम्झौता गरेको समाचार निराधार रहेको बताएको २४ घन्टा नबित्दै सम्झौताको समाचार बाहिर आएको हो ।
ज्लाटन जनवरीमा मिलान आएयता १८ खेल खेल्दै १० गोल गर्न सफल भएका थिए । उनकै उच्च प्रदर्शनमा मिलान १३ खेलसम्म अपराजित रहन सफल भएको थियो । इटालियन सिरी ‘ए’ सेप्टेम्वर १९ देखि सुरु हँुदै छ । क्लबले प्रशिक्षक स्टेफानो पिओलीको प्रशिक्षणमा प्रि–सिजन सुरु गरिसकेको छ । सम्झौता भएसँगै इब्राहिमोभिच प्रशिक्षणमा फर्कनेछन् ।