चितवन / भरतपुर महानगरपालिका–२९ स्थित नारायणगढ–मुग्लिन सडकखण्डको सुविधानगर क्षेत्रमा आइतबार बिहान करिब ६ः३० बजे योद्धा गाडी, बलेरो र मिनी ट्रक एकापसमा ठोक्किँदा ३ जना घाइते भएका छन् ।
प्रहरीका अनुसार नारायणगढबाट मुग्लिनतर्फ जाँदै गरेको बा.प्र.०१–०२८ च ३४७९ नम्बरको योद्धा गाडीले सोही दिशातर्फ अघि बढिरहेका ना४च ५७६३ नम्बरको बलेरो र भे१क २३६२ नम्बरको मिनी ट्रकलाई पछाडिबाट ठक्कर दिएको हो ।
- ADVERTISEMENT -
दुर्घटनामा बलेरोमा सवार चालकसहित तीन जना सामान्य घाइते भएका छन् । घाइतेहरूको भरतपुरस्थित नयाँ मेडिकल कलेजमा उपचार भइरहेको प्रहरीले जनाएको छ ।
घाइते हुनेमा बलेरो चालक नवलपुरको गैंडाकोट नगरपालिका–२ निवासी ४० वर्षीय देबेन्द्र सापकोटा, चितवनको भरतपुर महानगरपालिका–३ निवासी ४५ वर्षीय सुरेशराज महत्तो तथा भारत घर भई हाल नवलपुरको गैंडाकोट नगरपालिका–५ मा बसोबास गर्दै आएका ३२ वर्षीय मन्तोष कुमार रहेका छन् । तीनै जनाको अवस्था सामान्य रहेको प्रहरीले जनाएको छ ।
दुर्घटनापछि तीनवटै सवारीसाधन र घटनाबारे प्रहरीले थप अनुसन्धान गरिरहेको छ ।
