– बबिलाल तामाङ
चितवन । भरतपुर महानगरपालिका वडा नं. १ स्थित पवित्र धार्मिक तथा सामाजिक क्षेत्र देवघाटमा रहेको कच्ची सडक वर्षौँदेखि जीर्ण रहँदा स्थानीयवासी, विद्यार्थी तथा भक्तजनहरूले सास्ती व्यहोर्नु परेको छ ।
सो अन्तर्गत पर्ने संस्कृत माध्यमिक विद्यालय (पूर्वी भाग) को कच्ची सडकदेखि जानकी बालिका आश्रम (कन्या गुरुकुल), बौद्ध अन्त्येष्टि स्थलहुँदै नागकुण्ड नजिकसम्मको करिब १ किलोमिटर सडकखण्ड लामो समयदेखि स्तरोन्नति हुन सकेको छैन ।
- ADVERTISEMENT -
उक्त सडक खण्ड पक्की नहुँदा बर्खायाममा हिलाम्मे भएर सवारी साधन तथा पैदल यात्रीलाई आवतजावत गर्न कठिन हुने गरेको छ भने गर्मीमा अत्यधिक धुलो उड्दा सर्वसाधारण र स्थानीयको स्वास्थ्यमा प्रत्यक्ष असर परिरहेको छ ।
विशेषगरी दैनिक रूपमा विद्यालय जाने साना बालबालिका, जानकी बालिका आश्रमका आश्रमवासी, बौद्ध अन्त्येष्टि स्थलमा आउने सर्वसाधारणका साथै नागकुण्ड र देवघाट क्षेत्रमा आउने धार्मिक पर्यटक एवं दर्शनार्थीहरूले यो कच्ची सडकका कारण ठूलो समस्या भोग्नुपरेको छ ।
देछेन थर्वालिङ बौद्ध गुम्बा देवघाटका सल्लाहकार शम्भु पाख्रिनका अनुसार यो समस्या कुनै एक वर्षको मात्र नभई धेरै वर्षदेखि दोहोरिँदै आएको हो । पटक–पटक सरोकारवाला निकायको ध्यानाकर्षण गराउँदा पनि सडकको स्तरोन्नति र कालोपत्रे गर्नेतर्फ ठोस पहल हुन नसकेको स्थानीयहरुको गुनासो रहेको उनले बताए ।
वडा नं. १ अन्तर्गत रहेको सोही सडक निर्माणको मुख्य जिम्मेवारी वडाकै भएकाले महानगरसँग समन्वय गरेर अगाडि बढ्न वडाअध्यक्ष केशव महर्जनलाई आग्रह समेत गरेको उनले बताए । यद्यपि, वडा कार्यालयले बजेट अभावको बहाना बनाएर पन्छिन खोजेको आरोप उनको छ ।
भरतपुर महानगरपालिका वडा नं. १ का अध्यक्ष केशव महर्जनले सडक निर्माणका लागि पहल भइरहेको बताए । “उक्त सडक निर्माणका लागि ठूलो बजेट लाग्ने भएकाले वडाको सीमित स्रोत–साधनबाट मात्रै निर्माण गर्न कठिनाइ भएको हो,” महर्जनले भने, “ठूलो बजेट चाहिने भएकाले अब प्रदेश र सङ्घीय सरकारको सहयोगका लागि पहल भइरहेको छ ।”
विभिन्न मठ–मन्दिर तथा सङ्घ–संस्थामा बजेट विनियोजन गरेजस्तै यो महŒवपूर्ण सडक निर्माणका लागि पनि सबै पक्ष एकजुट भएर अगाडि बढ्नुपर्ने उनको आग्रह छ ।
भरतपुर महानगरपालिका, वडा कार्यालय तथा सम्बन्धित विकास निर्माणका निकायहरूलाई यस विषयमा गम्भीर बन्न र उक्त १ किलोमिटर सडक खण्डको शीघ्र मर्मत तथा कालोपत्रे गरी आवतजावत सहज बनाइदिन स्थानीयवासीले जोडदार माग समेत गरेका छन् ।
