काठमाडौं / नेपाल–चीन सीमा जोड्ने केरुङ नाकातर्फको बाढीले क्षतिग्रस्त सडक चीनले एक साताभित्रै पुनः निर्माण गरी सञ्चालनमा ल्याएको छ।
अगस्ट २६ मा हिमाली क्षेत्रमा आएको विनाशकारी बाढीका कारण चीनको तिब्बततर्फ केरुङ नाकासम्म पुग्ने सडक तथा अन्य पूर्वाधारमा ठूलो क्षति पुगेको थियो। सडक सम्पर्क विच्छेद भएपछि उद्धार तथा राहत सामग्री स्थलमार्गबाट प्रभावित क्षेत्रमा पुर्याउन कठिनाइ भएको थियो।
- ADVERTISEMENT -
चिनियाँ उद्धार तथा निर्माण निकायले सडक पुनः निर्माणका लागि ठूलो जनशक्ति र भारी उपकरण परिचालन गरेको थियो। उपलब्ध विवरणअनुसार चीनको चाइना एन्नेङ समूहले १५८ जना जनशक्ति र ३३ वटा भारी उपकरण परिचालन गरेर सडक मर्मत तथा पुनः स्थापनाको काम अघि बढाएको थियो।
तीव्र बहाव र पहिरोको जोखिमका बाबजुद काम अघि बढाउँदै सेप्टेम्बर २ सम्ममा केरुङ नाकासम्मको सडक पहुँच पुनः स्थापित गरिएको रोयटर्सले जनाएको छ। सडक खुलेसँगै उद्धारका लागि भारी उपकरण, खोजी उपकरण तथा उद्धार टोलीलाई स्थलमार्गबाट प्रभावित क्षेत्रमा लैजान सहज भएको छ।
यसअघि बाढीका कारण केरुङ–रसुवागढी क्षेत्रमा सडक तथा सीमा पूर्वाधारमा व्यापक क्षति पुगेको थियो। नेपालतर्फ भने रसुवागढी–स्याफ्रुबेँसी सडकखण्डमा समेत ठूलो क्षति भएकाले चीनतर्फ सडक सम्पर्क पुनः स्थापित भए पनि नेपालतर्फको सम्पूर्ण आवागमन पूर्ववत् हुन समय लाग्ने देखिएको छ।
