चितवन / भरतपुर फुटबल क्लब (बिएफसी) को आयोजनामा हुँदै आएको चितवन गोल्डकप फुटबल प्रतियोगिताको तेस्रो संस्करण हुने भएको छ ।
नेपाल प्रहरी शिक्षालय, भरतपुर तालिम केन्द्रको मैदानमा यही भदौ २७ गतेदेखि असोज ३ गतेसम्म सञ्चालन हुने आज (सोमबार) पत्रकार सम्मेलन मार्फत जानकारी गराइएको हो ।
- ADVERTISEMENT -
पत्रकार सम्मेलनमा बिएफसीका उपाध्यक्ष तथा प्रतियोगिता संयोजक धु्रव भुसालले यसअघिका संस्करणमा १० टोलीको सहभागिता रहँदै आएकोमा यसपटक प्रतियोगिताको स्तरीयता बढाउने उद्देश्यले ८ टोलीलाई मात्र सहभागी गराइने बताए ।
प्रतियोगितामा मलेसियाको एनपेनाड एफसी, भुटानको पक्षम फुटबल क्लब, नेपालका एपिएफ क्लब काठमाडौं, सातदोबाटो युवा क्लब ललितपुर, रेड हर्स एफसी इलामलगायतका टोलीले प्रतिस्पर्धा गर्नेछन् ।
प्रतियोगिताको विजेताले ट्रफीसहित ६ लाख रुपैयाँ पुरस्कार प्राप्त गर्नेछ भने उपविजेताले ३ लाख रुपैयाँ पाउनेछ। यस्तै, प्लेयर अफ द टुर्नामेन्टलाई २० हजार रुपैयाँ, विधागत उत्कृष्ट खेलाडीलाई १० हजार रुपैयाँ तथा प्रत्येक खेलका प्लेयर अफ द म्याचलाई केलही चितवनको तर्फबाट ५ हजार रुपैयाँ बराबरको पुरस्कार प्रदान गरिने आयोजकले जनाएको छ ।
प्रतियोगिता हेर्न दर्शकका लागि पहिलो चरणदेखि सेमिफाइनलसम्म १०० रुपैयाँ र फाइनल खेलका लागि २०० रुपैयाँ टिकट शुल्क तोकिएको छ।
प्रतियोगिताको मुख्य प्रायोजक हानामी इन्टरनेशनल रहेको छ भने भरतपुर महानगरपालिका संरक्षकका रूपमा रहेको छ । प्रतियोगिताका खेलहरू गोलनेपाल डटकममार्फत प्रत्यक्ष प्रसारण गरिनेछ ।
प्रतियोगिता सम्पन्न गर्न करिब ५४ लाख रुपैयाँ खर्च हुने अनुमान गरिएको आयोजकले जनाएको छ ।
