काठमाडौं / लगातारको वर्षाका कारण विभिन्न स्थानमा पहिरो खसेपछि मुग्लिन–नारायणगढ सडकखण्डमा सवारी आवागमन बन्द गरिएको छ ।
जिल्ला प्रशासन कार्यालय चितवनका अनुसार वर्षाका कारण सडकखण्डका विभिन्न स्थानमा निरन्तर पहिरो खसिरहेको छ । पहिरो पन्छाउने काम भइरहे पनि वर्षा नरोकिएकाले थप पहिरो खस्ने जोखिम रहेको भन्दै अर्को सूचना जारी नभएसम्मका लागि सडकखण्डमा सवारी आवागमन बन्द गरिएको हो ।
- ADVERTISEMENT -
सडकमा खसेको पहिरो हटाउने तथा सडक सञ्चालनमा ल्याउने काम भइरहेको प्रशासनले जनाएको छ। तर, प्रतिकूल मौसम र निरन्तर पहिरो खस्ने क्रमका कारण सडक कहिले सञ्चालनमा आउने भन्ने निश्चित छैन ।
सडकखण्ड बन्द रहेकाले अत्यावश्यक बाहेकका यात्रा स्थगित गर्न तथा वैकल्पिक मार्गको प्रयोग गर्न प्रशासनले यात्रु तथा सवारी चालकलाई अनुरोध गरेको छ ।
प्रशासनले सडकको अवस्था र आवागमन खुलाउने सम्बन्धमा आवश्यक सूचना जारी गर्ने जनाएको छ ।
