विश्व पञ्चशील गुम्बाद्वारा ल्होछारको तयारी तिब्र

0
209

भरतपुर । भरतपुर–११, लामाटोलमा रहेको विश्व पञ्चशिल शान्ति बुद्ध गुम्बाले माघ ११ गते २८५६औं सोनाम ल्होछार मनाउँदै छ । चन्द्र पात्रो अनुसार फग ल्हो (बँदेल वर्ग) विदाई गरी जीवा ल्हो (मुसा वर्ग) लाई स्वागत गर्दै मनाउने गुम्बाका अध्यक्ष शिवकुमारी लामाले बिहीबार पत्रकार सम्मेलनमा बताइन् ।
गुम्बाले ल्होछारको लागि भव्य तयारी गरिरहेको र विगत वर्षहरुमा यसपाली फरक तरिकाले मनाउने अध्यक्ष लामाको भनाइ छ । ल्होछारमा शुभकामना आदानप्रदान, गुम्बा परिसरमा निर्माण गरिएको नवनिर्मित मञ्च उद्घाटन गरिने उनले बताइन् । सो मञ्चका लागि ५ लाख खर्चेको उनको भनाइ छ ।
राष्ट्रिय लोकदोहोरी गायिका टिका सानु, मानसिंह खड्का तथा स्थानीय कलाकारहरुको प्रस्तुति रहने छन् । बागमती प्रदेशका संसद मिलनबाबु श्रेष्ठको प्रमुख आतिथ्यतामा सम्पन्न हुने उनले जानकारी गराइन् ।
लामाका अनुसार डेढ विगाह क्षेत्रफलमा स्थापना भएको सो गुम्बा निर्माणका लागि २७० घरधुरीको आर्थिक सहयोग रहेको छ । गुम्बामा आवद्ध सदस्यहरूबाटै रकम संकलन गरी मनाउने तयारी गरिएको अध्यक्ष लामाले बताए । सोही कार्यक्रममा गुम्बा निर्माणमा आर्थिक सहयोग गर्ने सहयोगी दातालाई सम्मान गरिने उनले बताइन् । लामाका अनुसार ल्होछारको लागि करिब ३ लाख खर्च हुने अनुमानत गरिएको छ ।
वि.सं. २०६४ सालमा स्थापना भएको सो गुम्बा स्थानीय आमा समूहका सदस्यहरुबाट थोरै थोरै रकम संकलन गरी निर्माण गरेको गुम्बाकी संस्थापक अध्यक्ष लालमति लामाले जानकारी गराइन् । गुम्बा स्थापनाकालदेखि हालसम्म महिलाहरुले नै नेतृत्व गर्दै आइरहेका छन् ।