क्याम्पाचौरमा महिला फुटबल प्रतियोगिता हुने

नारायणगढ । नारायणगढको क्याम्पाचौरमा चितवन जिल्ला फूटबल संघको आयोजनामा मंसिर १७ गतेदेखि स्व. जगदीश खड्का स्मृति महिला फुटबल प्रतियोगिता–२०७६ हुने भएको छ ।
प्रतियोगितामा प्रदेश नम्बर २, ३ र ४ का ४ जिल्लाबाट ८ वटा टिम सहभागी हुनेछ भने उक्त खेल ४ दिन चल्नेछ । चितवनबाट मात्रै ३ टिमको सहभागिता रहनेछ । पञ्चकन्या महिला टिम ‘ए’, पञ्चकन्या महिला टिम ‘बी’ र हानमी एभरेष्ट क्लब चितवन सहभागी हुनेछन् ।
त्यस्तैगरी प्रदेश ३ बाटै मकवानपुर महिला टिम, प्रदेश २ बाट बागमती फुटबल क्लब सर्लाही तथा प्रदेश ४ को नवलपुरबाट भेंडाबारी महिला टिम, बरचुली मा.वि. र अभिषेक चर्च रजहर सहभागी हुने प्रतियोगिताका संयोजक प्रविन जोशीले बताए ।
प्रतियोगिताका सहभागी टोलीलाई दुई समूहमा विभाजन गरिएका छन् भने फाइनल खेल मंसिर २० गते हुनेछ । विजेताले ४० हजार र उपविजेताले २० हजार नगद पुरस्कार र ट्रफी पाउने चितवन जिल्ला फुटबल संघका महासचिव रामहरि ढकालले जानकारी दिए ।
त्यस्तै सर्वोत्कृष्ट खेलाडीलाई १० हजार तथा उत्कृष्ट फरवार्ड, डिफेण्डर र गोलकिपरलाई जनही ५ हजार रुपैयाँ नगद पुरस्कार दिइनेछ । हरेक म्याचका प्लेयर अफ दी म्याचलाई २ हजार नगद दिइनेछ ।
अखिल नेपाल प्रशिक्षक संघका केन्द्रीय अध्यक्ष विनोद लामाले महिला फुटबलमा सम्भावना धेरै भए पनि खेलाडीलाई सुविधा र अवसर कम भएको बताए ।