इच्छाकामना गाउंँपालिकालाई आर्थिक सहयोग प्रदान

भरतपुर, चितवन । इच्छाकामना गाउंँपालिकालाई प्रजातान्त्रिक विचार समाज चितवनले ५१ हजारको चेक हस्तान्तरण गरेको छ । समाजले चितवनको एकमात्र गाउंँपालिकालाई क्वारेण्टाइन व्यवस्थापन र दैनिक ज्याला मजदुरको लागि सहयोग पुर्याउने उद्देश्यले संस्थाका अध्यक्ष डा देवीप्रसाद कंडेलसहितले गाउंँपालिकाका अध्यक्ष गीता गुरुङ्गलाई चेक हस्तान्तरण गरेका हुन् ।
अध्यक्ष डा कंडेलले सरकारले पर्याप्त रुपमा कोरोना भाइरसको जोखिम न्यूनीकरणमा खासै ध्यान दिन नसकेको अवस्थामा क्वारेटाइन व्यवस्थापन सहज पुगोस् भन्ने हेतुले सहयोग गरिएको बताए । ‘यो गाउंँपालिका चितवनको विकट ठाउंँ हो, त्यहांँ श्रोतसाधन पनि कम छ । पिछडिएका वर्गको बाहुल्यता छ ।’ डाक्टर कंडेलले भने । विगतमा पनि अध्यक्ष गुरुङ्गले पहल गरेको अलपत्रहरुको उद्धार कार्यको प्रशंसा गर्दै यो सहयोगबाट थप उर्जा मिल्ने उनले विश्वास व्यक्त गरे ।
गाउंँपालिकाका अध्यक्ष गुरुङ्गले यो सहयोगले आफूलाई थप दायित्व र उर्जा मिलेको बताइन् । गाउंँपालिकामा आन्तरिक श्रोत साधन कम भएको र बिशेषगरी पिछडिएका वर्ग बस्ने भएकोले उनीहरुको लागि दैनिक उपभोग्य वस्तु तथा क्वारेण्टाइनमा बस्ने व्यत्तिहरुको लागि खर्च गरिने उनले बताइन् । ‘विभिन्न संस्थाहरुबाट नगद तथा जिन्सी सामान सहयोग प्राप्त हुदै आएको छ उनले भनिन्, गाउंँपालिकामा रोग तथा भोकले कोही नमरुन भन्ने हाम्रो उद्देश्य हो ।’
उनका अनुसार विदेशबाट आएका क्वारेण्टाइन र ज्याला मजदुरको राहतको लागि खर्च गरिने छ । हालसम्म गाउंँपालिकाले त्यहांँ रहेका ४ हजार ५ सय ज्याला मजदुरलाई राहत वितरण गरिसकेको छ ।
समाजका सचिव सुरेशचन्द्र आचार्यले गाउंँपालिकामा रहेका काम र माम नपाएका ज्याला मजदुरलाई लक्षित गर्दै उक्त पालिका छनौट गरिएको बताए । हस्तान्तरण कार्यक्रममा विशिष्ट अतिथि समाजका केन्द्रीय उपाध्यक्ष डाक्टर ईश्वरीराज लौडारी, वागमती प्रदेश संयोजक भरत दवाडी तथा संस्थाका पदाधिकारी एवं डाक्टर, वकिल, प्राध्यापकहरुको सहभागिता रहेको थियो ।