रत्ननगरको सुकुमबासी बस्तीसहित साविक वडा नं १३ सिल

चितवन / रत्ननगर नगरपालिका वडा नं १३ मा रहेका प्रगति सुकुमबासी बस्ती सहित साविक १३ नम्बर वडाको क्षेत्रलाई सिल गरिएको छ । सुकुमबासी बस्तीका ६३ बर्षीय पुरुषमा कोरोना संक्रमण पुष्टि भएपछि सुकुमबासी बस्ती सहित साविक १३ नम्बर वडाको क्षेत्र सिल गरिएको हो ।
सो वडाको पूर्वमा बुढिकुलो, पश्चिममा पञ्चकन्या मावि, दक्षिणमा बैरिया मावि र उत्तरमा सुवेदी चोक सम्मको क्षेत्रलाई सिल गरिएको वडाध्यक्ष चित्रबहादुर भण्डारीले जानकारी दिए ।
कोरोना संक्रमित क्षयरोगले ग्रसित रहेको र परिवारमा ६ जना रहेकाले जोखिम रहेको छ । परिवारको सदस्यलाई होम क्वारेन्टाइनमा राखेर बस्ती सहित आसबासका क्षेत्र सिल गरिएको स्वास्थ्य शाखा प्रमुख माधव प्रसाद पौडेलले जानकारी दिए ।
कोरोना संक्रमितको उपचारको लागि शुक्रवार नै भरतपुर अस्पतालमा भर्ना गरिएको छ ।
सुकुमवासी बस्ती र साविक १३ नम्बर वडाको उल्लेखित क्षेत्रमा हिडडुलमा रोक लगाइएको छ । यस अघि सौराहाको प्रभू बैंकका कर्मचारीमा कोरोना संक्रमण देखिएपछि सौराहाका बैंक, वित्तीय संस्था, सहकारी तथा अन्य संघसंस्था बन्द गरिएको थियो ।