नेपालीको उद्धारका लागि चार्टर उडान पुन: शुरु

काठमाडौं / कोभिड–१९ महामारीका कारण विदेशमा अलपत्र परेका नेपालीको उद्धारका लागि चार्टर उडान पुन: शुरु भएको छ । यही साउन ३० गतेबाट विदेशमा अलपत्र परेका नेपालीहरुलाई नेपाल ल्याउने सरकारको निर्णयको कार्यान्वयन भएको हो ।
नेपालका दुई वायु सेवा कम्पनी- नेपाल एयरलाइन्स र हिमालय एयरलाइन्ससहित विभिन्न विदेशी एयरलाइन्सहरुले नेपालीलाई स्वदेश फर्काउन चार्टर उडान गर्न लागेका हुन्।
नेपाल एयरलाइन्सले भाद्र १ गतेदेखि १५ गतेसम्म उद्धार उडान गर्ने तालिका सार्वजनिक गरेको छ भने हिमालय एयरलाइन्सले साउन ३० गते देखि भाद्र १४ गतेसम्मको उद्धार उडान तालिका सार्वजनिक गरेको छ।
यसअधि सरकारले भदौ १ गतेदेखि आन्तरिक र अन्तर्राष्ट्रिय व्यवसायिक उडान खोल्ने घोषणा गरेको भएपनि कोभिडको महामारी राजधानी काठमाडौंसहित देशका विभिन्न स्थानमा तीव्र रुपमा फैलिएपछि भदौ १५ गतेसम्म व्यवसायिक उडान स्थगन गर्ने निर्णय गरेको थियो ।
विदेशमा अलपत्र परेका नेपाली ल्याउन उद्धार उडान भने नियमित हुनेछन् । सरकारले अबको उद्धार उडानमा दैनिक पाँच सय जनालाई स्वदेश फर्काउने निर्णय गरिसकेको छ ।
तीमध्ये २०० जनालाई सरकारले आफ्नै खर्चमा ल्याउने छ भने ३०० जना आफ्नै खर्चमा टिकट लिएर आउने छन् ।
स्वदेश फर्कने नेपालीलाई सम्बन्धित मुलुकमा रहेका नेपाली दूतावासले गरेको सिफारिसका आधारमा नेपाल ल्याइने छ ।
कोभिड–१९ सङ्कट व्यवस्थापन केन्द्र (सीसीएमसी) को विवरण अनुसार यही साउन २९ गतेसम्म विदेशबाट ५० हजार ६सय ६२ जना नेपाली स्वदेश फर्किसकेका छन्।