पहिरोमा एकै परिवारका ४ सहित १० को मृत्यु

कालिकोट / कालिकोटको नाग्म बजारमा आइतबार गएको पहिरोमा परी मृत्यु हुनेको सङ्ख्या १० पुगेको छ ।
कालिकोटको तिलागुफा नगरपालिका–१ नाग्मका चार घर भत्किँदा एकै परिवारका चारसहित १० जनाको मृत्यु भएको हो । पहिरोमा परेका दुई जना अझै बेपत्ता छन् ।
घटनास्थलबाट उद्धार गरिएका दुई जनालाई उपचारका लागि कर्णाली स्वास्थ्य विज्ञान प्रतिष्ठान जुम्लामा लगिएको छ । नाग्म बजारको पछाडिपट्टिको भिरालो जमिन आइतबार बिहान भासिएर पहिरो जाँदा घरभित्रै रहेकाहरू पुरिएका हुन् ।
पहिरोले पुरिएकामध्ये १० को शव राति फेला परेको हो ।
जीवितै उद्धार गरेर अस्पताल पठाइएका अर्जुन हमाल र पुन्नी शाहीको अवस्था सामान्य रहेको कर्णाली स्वास्थ्य विज्ञान प्रतिष्ठानले जनाएको छ ।