कोरोना संक्रमणबाट आज २ जनाको मृत्यु

चितवन / चितवनमा कोरोना संक्रमणबाट दुई जनाको मृत्यु भएका छन् । चितवन मेडिकल कलेज र भरतपुर अस्पतालमा गरी उपचारक्रममा आज दुई जनाको मृत्यु भएको हो ।
चितवन मेडिकल कलेज भरतपुरका निर्देशक प्राडा दयाराम लम्सालका अनुसार नवलपुरको देवचुली नगरपालिका वडा नं ११ निवासी ३१ वर्षीय पुरुषको बिहीबार राति १२ः१८ बजेको समयमा मृत्यु भएको हो ।
स्वासप्रश्वास र निमोनियाको समस्या भएपछि भदौ २५ गते अस्पताल भर्ना भएका उनको २६ गते कोरोना सङ्क्रमण पुष्टि भएको थियो । उनको सघन उपचार कक्षमा भेन्टिलेटरमा राखी उपचार गर्दा गर्दै मृत्यु भएको लम्सालले जानकारी दिनुभयो ।
त्यसैगरी भरतपुर अस्पतालमा उपचाररत सर्लाहीको हरिपुर गाउँपालिकाका ५५ वर्षीय पुरुषको शुक्रबार बिहान १० वजे मृत्यु भएको हो । अस्पतालद्वारा जारी सूचनामा मृगौलाको डायलासिस गरिरहेका उनको यही भदौ १८ गते कोरोना सङ्क्रमण पुष्टि भएको थियो ।
उनको खोकीसँगै स्वाशप्रश्वासमा समस्या देखिएपछि भदौ २३ गतेदेखि कोभिड–१९ सघन उपचार कक्षमा उपचारका क्रममा मृत्यु भएको हो ।
हालसम्म जिल्लामा उपचारका क्रममा र घरमा गरी मृत्यु हुनेको संख्या २९ पुगेको स्वास्थ्य कार्यालयले जनाएको छ । जस मध्ये चितवनका मात्र १७ जना रहेका छन् ।