आइसोलेशनमा नबस्ने मानिसलाई ६ महिनासम्म जेल

काठमाडौं / सरकारले कोरोना पोजेटिभ भएर आइसोलेशनमा नबस्ने मानिसलाई ६ महिनासम्म जेलमा राख्ने चेतावनी दिएको छ ।
स्वास्थ्य तथा जनसङ्ख्या मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले कतिपय सङ्क्रमित आइसोलेशनमा नबसेर बाहिर निस्किएको वा काममा समेत जाने गरेको सूचना आएको भन्दै त्यस्ता व्यक्तिलाई पक्राउ गरी सङ्क्रामक रोग ऐनअनुसार कारबाही गर्ने बताए ।
मन्त्रालयले पक्राउ गरी कारबाहीका लागि गृह मन्त्रालयलाई अनुरोध गरिसकेको भन्दै प्रवक्ता गौतमले कोरोना सङ्क्रमित भएको व्यक्ति आइसोलेशनमा बसे नबसेको बारेमा जानकारी लिन छिमेकीहरुलाई आग्रह गरे ।
केही दिनयता काठमाडौं उपत्यकासहित देशैभर कोरोना भाइरसको जोखिम बढिरहेकाले दशैं तिहारमा भिडभाड नगर्न पनि मन्त्रालयले आग्रह गरेको छ । यस वर्ष पुरानै कपडा लगाएर दशैँ मनाउन सबैलाई अनुरोध गरेको छ । अनलाइन वा फोनबाट नै यो वर्षको दशैं तिहारमा आशीर्वाद लिन उनले आग्रह गरे ।