भुम्लिचोक / गण्डकी गाउँपालिका गोरखाले दशैं मनाउन गाउँ आउनेलाई १४ दिन होम क्वारेन्टाइनमा बस्न आग्रह गरिएको छ । जिल्ला बाहिरबाट दशैं मनाउन गाउँ आउनेहरुलाई १४ दिन होम क्वारेन्टाइन बस्न आग्रह गरिएको गाउँपालिकाका अध्यक्ष होमबहादुर रानामगरले बिहीबार एक प्रेस नोट जारी गर्दै जानकारी गराएका हुन् ।
नेपालीहरुको चाडवाड नजिकिदैँ गर्दा मानिसहरुको आवागमन बढ्ने र जिल्ला बाहिर भएकाहरु घर फर्कदाँ कोरोना भाइरस (कोभिड–१९) को संक्रमण फैलन सक्ने अवस्थालाई मध्यनजर गर्दै गाउँपालिकाले १४ दिन क्वारेन्टिनमा बस्न आग्रह जारी गरिएको प्रेस नोटमा उल्लेख छ ।
गाउँपालिकाले संक्रमण बढिरहेको बेला सकेसम्म जहाँ छ त्यही बसेर दशैँ मनाउन पनि अनुरोध गरेको छ । अति आवश्यक काम बाहेक अन्य समयमा बाहिर हिँडडुल नगर्न र होम क्वारेन्टिनमा रहँदा स्वास्थ्य समस्या आएमा गाउँपालिका अध्यक्ष, स्वास्थ्य शाखा संयोजक वडाध्यक्ष लगायत जनप्रतिनिधिहरुलाई सम्पर्क गर्न समेत अनुरोध गरिएको छ ।
साथै गाउँपालिकाले चाड पर्व मनाउँदा पारिवारिक रुपमा आफ्नो घरमा सिमित रही सुरक्षित तवरले मनाउन र खेलकुद, जात्रा, मेला लगायत कुनै पनि किसमिका धार्मिक, सांस्कृतिक तथा राजनैतिक कार्यक्रमहरु आयोजना नगर्न समेत अनुरोध गरेको छ ।
- ADVERTISEMENT -
