मैत्रीपूर्ण खेलको लागि नेपाली राष्ट्रिय फुटबल टोली आज ढाका जाँदै

काठमाण्डौ / बंगलादेशसँगको मैत्रीपूर्ण खेल खेल्न नेपाली राष्ट्रिय फुटबल टिमको विदाई गरिएको छ । अखिल नेपाल फुटबल संघ (एन्फा) ले बुधबार नेपाली टोलीलाई विदाई गरेको हो ।
राष्ट्रिय खेलकुद परिषद (राखेप) का सदस्य सचिव रमेश सिलवाल, एन्फाका अध्यक्ष कर्मा छिरिङ शेर्पा लगायतले खेलाडीलाई विदाई गर्नुभएको हो । २५ खेलाडी र ७ पदाधिकारीसहितको नेपाली टिम आज बिहीबार ढाका प्रस्थान गर्ने छन् । प्रशिक्षणमा बोलाईएका खेलाडीमध्ये ७ जना कोरोना सङ्क्रमण देखिएपछि बंगलादेश जाने छैनन् ।
यस्तै रोहित चन्दले चोटका कारण बंगलादेश भ्रमण गुमाउने छन् । नेपालले कार्तिक २८ र मंसिर २ गते बंगलादेशसँग दुई मैत्रीपूर्ण खेल खेल्नेछ । नेपालले बाल गोपाल महर्जनको प्रशिक्षणमा बंगलादेशसँग खेल्नेछ । मुख्य प्रशिक्षक योहान कालिन स्विडेनमा रहेको कारण एन्फाले महर्जनलाई टिम हेर्ने जिम्मेवारी दिएको हो ।
कोरोना भाईरसको महामारीको कारण स्विडेन सरकारले भ्रमणमा कडाई गरेपछि कालिन नेपाल फर्कन नपाएको एन्फाले जनाएको छ ।