चितवनमा बालबालिका बेपत्ता हुने क्रम नरोकिएपछि थप चुनौति

–सुरक्षा न्यौपाने
चितवन / चितवनमा विभिन्न कारणले बालबालिका बेपत्ता हुने क्रम नरोकिएको एक अध्ययनले देखाएको छ । कोरोना महामारीको समयमा समेत बेपत्ता हुने क्रम नरोकिएपछि थप चुनौति बढ्दै गएको जिल्ला प्रहरी कार्यालयले चितवनले जनाएको छ ।
जिल्ला प्रहरी कार्यालय चितवनको तथ्याङ्क हेर्दा बालबालिका बेपत्ताको उजुरी पर्ने क्रम निरन्तर बढिरहेको छ । आफ्ना बालबालिका बेपत्तापछि खोजिदिन माग राख्दै निवेदन दिनेको संख्यामा बृद्धि हुँदै गएको प्रहरीको तथ्यांकमा उल्लेख छ ।
प्रहरीको तथ्याङ्क अनुसार चितवनमा आर्थिक वर्षको ५ महिनामा मात्रै ३९ जना बालबालिका बेपत्ता भएका छन् । जसमध्ये ३० जना मात्रै फेला परेका छन् भने बाँकी अझै फेला परेका छैनन् ।
बालबालिका खोज्न अनुरोध गर्दै निवेदन पर्ने क्रम निरन्तर बढिरहेको जिल्ला प्रहरी कार्यालय चितवनका प्रवक्ता सूर्य थापाले बताए । उनले बेपत्ता भए लगत्तै निवेदन आउने र प्रहरी संयन्त्रपछि अधिकांश भेटिएको र नभेटिएकालाई खोजतलासको क्रम जारी रहेको जानकारी गराए ।
उनका अनुसार बेपत्ता हुनेमा १५ वर्षदेखि १८ वर्ष उमेर समुहका किशोरीहरु बढी छन् । यस्तै सोही अवधिमा यो वर्षको ५ महिनामा मात्रै १२ बालक बेपत्ता भएकोमा १० जना र २७ बालिकामा २० जना भेटिएका छन् ।
यस्तै गतवर्ष १ सय २५ जना बेपत्ता भएको निवेदन प्रहरीमा परेको थियो । ३५ बालक हराएकोमा ३५ जना नै फेला परेका थिए । ९० जना बालिका हराएकोमा ८८ जना फेला परेका छन् भने २ जना अझै बेपत्ता रहेका छन् ।
आर्थिक वर्ष ०७४/०७५ मा १ सय ३१ जना बालबालिका हराएकोमा १ सय २२ जना भेटिएका थिए भने ०७५/०७६ मा हराउने बालबालिकाको संख्या बढेर १ सय ७५ पुगेको छ भने सोही वर्ष भेटिएका बालबालिकाको संख्या भने १ सय ७४ जना पुगेको प्रहरीको भनाइ छ ।