पाँच महिनामा १ सय ५८ दुर्घटना, ४० जनाले ज्यान गुमाए

–सुरक्षा न्यौपाने
चितवन । चितवनमा मोटरसाइकल दुर्घटना अत्यधिक पाइएको छ । चालू आर्थिक वर्षको ५ महिनामा भएका १ सय ५८ दुर्घटना परी ४० जनाले ज्यान गुमाएको जिल्ला ट्राफिक प्रहरी कार्यालय चितवनका प्रमुख दयाकृष्ण भट्टले जानकारी दिए ।
प्रमुख भट्टका अनुसार उक्त दुर्घटनामा १ सय ४० सामान्य घाइते भएका छन् भने २३ जना गम्भीर घाइते भएका छन् । मृत्यु हुनेमा सबैभन्दा बढी मोटरसाइकल सवार रहेको कार्यालयको तथ्यांकले जनाएको छ ।
गत आर्थिक वर्षमा २ सय ६१ सवारी दुर्घटनाबाट १ सय ७ जनाको मृत्यु भएको थियो । दुर्घटनामा १ सय ६५ गम्भीर घाइते भएका थिए भने ३ सय २१ सामान्य घाइते भएका थिए । गत वर्षको तुलनामा चालू आवमा दुर्घटना निकै बढेको छ भने ग्रामीण सडकमा समेत दुर्घटना बढेपछि चुनौती थपिएको उनले बताए ।
सवारीसाधनको चापमा वृद्धि, युवापुस्ताले तीव्र गतिमा सवारी हाँक्नु, अटेर गरी मदिरा सेवन गरेर सवारी चलाउने जस्ता कारणले दुर्घटना बढेको उनको भनाइ छ । प्रहरीले टोलटोलमा ट्राफिक प्रहरी भन्ने अभियानका साथ जनचेतनामुलुक कार्यक्रम चलाइएको, दुर्घटना न्यूनीकरणको लागि विशेष ट्राफिक चेकजाँच अन्तरगत तीब्रगति मादक पदार्थ सेवन, रुढ प्रमिट लगायतका चेकजाँच गर्ने गरेको उनले भने ।
नारायणगढ–मुग्लिन सडकमा ब्रेकरका कारण दुर्घटनामा कमी आए पनि बजारी क्षेत्रमा ट्राफिक नियम पालना नगर्दा दुर्घटना बढेको छ । प्रहरीले ट्राफिक जनचेतनामूलक कार्यक्रम, सवारी मेकानिकल परीक्षण, चालकको स्वास्थ्य परीक्षण, ठाउँठाउँमा चेकजाँच, साँझमा मादक पदार्थ सेवन परीक्षणजस्ता कार्यक्रम गरिरहेको छ ।