चितवनमा ‘गौतमबुद्ध कप–२०२० क्रिकेट प्रतियोगिता’ सुरु, फाइनल मंसिर ३० गते

चितवन / चितवनको निर्माणाधिन गौतमबुद्ध अन्तर्राष्ट्रिय क्रिकेट रंगशालामा ‘गौतमबुद्ध कप–२०२० क्रिकेट प्रतियोगिता’ सुरु भएको छ । शनिबार सुरु भएको ‘गौतमबुद्ध कप–२०२० क्रिकेट प्रतियोगिता’मा टिम नारायणी र बागमतीबीच हुने भएको हो ।
भरतपुर महानगरपालिकाको रामपुरमा वाग्मती प्रदेश क्रिकेट संघको आयोजना तथा चितवन क्रिकेट संघको संयोजनमा प्रतियोगिता शुरु भएको हो । उक्त खेल निर्माणाधीन रंगशालाको नमूना मैदानमा भइरहेको छ ।
प्रतियोगितामा सहभागिता जनाउने तीन टोली छन् । खेलमा टिम बाग्मती, टिम नारायणी र टिम राप्तीको सहभागिता रहेको छ । वाग्मतीको कप्तानमा राष्ट्रिय टोलीको समेत कप्तान रहेका ज्ञानेन्द्र मल्ल रहेका छन् । यस्तै नारायणीको कप्तान सुबास खकुरेल रहेका छन् ।
यसअघि पूर्वराष्ट्रिय कप्तान पारस खड्काले कप्तानी गर्ने भनिएकोमा पारसलाई कोरोना पुष्टि भएपछि सुबासले कप्तानी सम्हालेका हुन् । राप्तीको कप्तानमा विनोद भण्डारी छन् ।
प्रतियोगिताको दोस्रो खेलमा भोलि वाग्मती र राप्ती भिड्नेछन् भने तेस्रो खेलमा राप्ती र नारायणी भिड्ने छन् । शीर्ष दुईमा रहने टोली फाइनलमा प्रवेश गर्नेछ । फाइनल खेल मङ्सिर ३० गते हुने छ ।