काभ्रेको ‘तीनतले’ र ‘इन्द्रेणी’ झरना पर्यटकीय गन्तव्य बन्दै

काभ्रे / काभ्रेपलाञ्चोक जिल्लाको बेथानञ्चोक गाउँपालिका वडा नम्बर–१ मा तीनतले झरना र इन्द्रेणी झरना अवस्थित छ । विगत केही समयदेखि तीनतले झरना र इन्द्रेणी झरना अवलोकनका लागि आन्तरिक पर्यटक दिनानुदिन बढ्न थालेको छ ।
यसअघि चर्चामा नआएका यी दुई झरना स्थानीय युवाहरुले हाल प्रचार प्रसारमा जोड दिएपछि हाल तीनतले र इन्द्रेणी झरनाको चर्चा सुरु हुन थालेको छ । प्रचार प्रसारपछि च्याम्राङबेसी वडा नम्बर–१ च्यालममा रहेका यी दुई झरनामा दैनिक रुपमा आन्तरिक पर्यटक बढ्न थालेको हो ।
यी दुई झरना काठमाडौंदेखि ५५ किलोमिटर, बनेपाबाट ३१ किलोमिटर र पनौेतीदेखि २६ किलोमिटरको दुरीमा पर्दछ । जसले गर्दा पर्यटकीय पूर्वाधार निर्माणको सुरूवातसँगै यी दुई झरना छोटो समयमा नै अहिले आन्तरिक पर्यटकको रोजाईमा पर्न थालेका छन् ।
वडाले तीनतले झरनाको सुधारका लागि दुई लाख बजेटसमेत विनियोजन गरेको छ । विदेशी पर्यटकका लागि समेत मुख्य गन्तव्य बन्न सक्ने यी दुई झरनामा विदेशी पर्यटक भित्र्याउनका लागि पर्यटन व्यवसायी समेत लागेका छन् ।
अहिले गाउँपालिकाका सबै स्थानमा सडक मार्गको सहज पहुँच भएसँगै पनि आन्तरिक पर्यटकको घुइँचो लाग्न थालेको हो । यी झरनामा पैदल यात्रा गरी गरिने दृश्यावलोकनको छुट्टै आनन्द त छँदैछ यदि आफ्नै सवारीसाधन मोटरसाईकल वा गाडीमा जान चाहे पनि सहजै पुग्न सकिन्छ ।
सुन्दर प्राकृतिक मनोरम दृश्य तथा लामो छाँगोबाट झरेको पानीको फोहरा र त्यसबाट आउने शीतल पानीका कण र चिसो हावाको स्पर्शले पर्यटकको मन लोभ्याइदिन्छ । अहिले शनिबार र बिदाको दिनमा समूह–समूहमा पर्यटक यी दुई झरनामा पुग्ने गरेका छन् ।
पर्यटकीय दृष्टिकोणले राजधानीबाट नजिकै पर्ने भएकाले भविष्यमा यस दुई झरनाले आन्तरिक तथा बाह्य पर्यटक आकर्षित गर्न सक्ने सम्भावना देखिन्छ ।