मकवानपुरका सबै पार्टी प्यालेस पूर्ण रुपमा बन्द हुने

मकवानपुर / मकवानपुरमा भोलि बैशाख १४ गते मंगलबारदेखि पार्टी प्यालेस पूर्ण रुपमा बन्द हुने भएको छ । जिल्ला कोभिड–१९ संकट व्यवस्थापन केन्द्रको सोमबार बसेको बैठकले उक्त निर्णय गरेको हो ।
बैठकले अर्को निर्णय नभएसम्मका लागि गच बैशाख ७ मा भएका निर्णय अनुसार बिवाह वा बर्तबन्धलाई पार्टी प्यालेस प्रयोग गर्नुपर्ने भएमा पूर्व स्वीकृती लिनु पर्ने प्रावधानलाई खारेज गर्ने निर्णय गरेको छ ।
साथै उक्त बैठकले छिमेकी मुलुक भारत तथा प्रदेश नम्बर–२ बाट रातोमाटे नाका हुँदै मकवानपुर जिल्ला प्रवेश गर्ने यात्रुहरुको ज्वरो नाप्ने ÷परीक्षण गर्ने, साबुन पानीले हात धुन लगाउने, मास्क र सेनेटाइजरको प्रयोग गर्न लगाएर मात्र पठाउने व्यवस्था मिलाउने निर्णय गरेको छ ।
बैठकले हेटौँडा बजारमा फुटपाथमा गरिने स्ट्रिट फुट व्यापारलागयत अन्य सबै फुटपाथ व्यापार व्यवसायहरु तत्काल बन्द गर्ने÷गराउने व्यवस्था हेटौँडा उपमहानगरपालिकाले गर्ने निर्णय गरेको छ ।
साथै हेटौँडा बसपार्कस्थित तरकारी बजार र माछामासु बजार एबम् खोपेगल्लिस्थित तरकारी बजार बिहान ४ बजेदेखि ८ बजेसम्ममात्रै संचालन गर्ने निर्णय पनि गरेको जिल्ला प्रशासन कार्यालय मकवानपुरले जनाएको छ ।
जिल्लामा संक्रमणको क्रम बढ्दै गएकाले अक्सिजनको अभाव हुन नदिनको लागि आवश्यक तयारी गर्ने बैठकले निर्णय गरेको छ ।
बैठकले अक्सिजनको आपूर्तिलाई सहज बनाउनका लागि अक्सिजन सिलिण्डर आपूर्तिकर्ताहरुसंगको समनवयमा हाल मौज्दातमा रहेका अक्सिजनको विवरण माग गर्ने र स्वास्थ्य कार्यालय मकवानपुरको नेतृत्वमा निरन्तर अनुगमन गर्ने निर्णय गरेको जिल्ला प्रशासन कार्यालय मकवानपुरका सूचना अधिकारी देवचन्द्र गर्तौलाले जानकारी दिए ।