अलपत्र ८३ वर्षीय वृद्धको उद्धार

देवघाट / देवघाट गाउँपालिका–५ मा करिब बीस वर्षदेखि बसोबास गर्दै आएका ८३ वर्षीय वृद्धको उद्धार गरिएको छ । केही समयदेखि विरामी भएर एक्लै बस्दै ती वृद्धको मंगलबार उद्धार गरिएको गाउँपालिका अध्यक्ष दुर्गाबहादुर थापाले जानकारी दिए ।
अध्यक्ष थापाका अनुसार उनी देवघाटको पुरानो झोलुङ्गे पुल नजिकैको काठबाट निर्मित सामान्य घरमा बसेर आफ्नो दैनिक गुजारा गर्दै आएका हुन् । ती वृद्ध दोहोरो कुरा गर्न नसक्ने, कान कम सुन्ने र आँखा पनि कम देख्ने विगत २० दिनदेखि बिरामी भएर काठको सामान्य घरमा एक्लै बस्दै आएका थिए ।
वृद्धको देवघाट स्थित धर्मार्थ अस्पतालमा गरिए पश्चात स्वास्थ्यमा क्रमिक सुधार र कोरोना परीक्षण रिपोर्ट नेगेटिभ आएपछि मानव सेवा आश्रममा लगिएको अध्यक्ष थापाले बताए । वृद्धको साथबाट मागेर जम्मा गरेको पाँच हजार रुपैयाँ पनि मानव सेवा आश्रमलाई नै बुझाइएको छ । आगामी आर्थिक वर्षको बजेटमा मानव सेवा आश्रमलाई पनि निश्चित रुपमा केही सहयोग रकम विनियोजन गर्ने उनले बताए ।