हवाई उडानले जोडिए देशका चार पर्यटकीय गन्तव्य

चितवन / देशका प्रमुख चार पर्यटकीय गन्तव्य काठमाडौं, पोखरा, चितवन र लुम्बिनि हवाई उडान मार्फत जोडीएका छन् । चारै गन्तव्यमा बुद्ध एयरले हवाई सेवा सञ्चालन गरे संगै यी महत्वपूर्ण गन्तव्य हवाई सेवा मार्फत जोडीएका हुन । भरतपुर–भैरहवा उडान सुरु भए संगै चार गन्तव्य जोडीएका हुन । बुद्ध एयरले आईतबार बाट भरतपुर–भैरहवा उडान थालेको हो ।
बुद्ध एयरलाईन्स भरतपुरका प्रबन्धक भक्त बहादुर बस्नेतका अनुसार भरतपुर–काठमाडौं दैनिक ९ वटा उडान हुँदै आएको छ । भरतपुर–पोखरा दैनिक एउटा र भरतपुर–भैरहवा हप्ताको तीन उडान भर्न थालिएको छ । आइतबार, बुधबार र शुक्रबार उडान थालिएको उहाँले जानकारी दिनुभयो । बस्नेतले भन्नुभयो “पर्यटकीय गन्तव्य संगै उपचारका लागि भरतपुर आउन सहज भएको छ ।”यस संगै नारायणगढ–वुटवल सडक बिस्तार भैरहेकाले यात्रुलाई सहज भएको उहाँको भनाई छ ।
क्षेत्रीय होटल संघका निवर्तमान अध्यक्ष सुमन घिमिरे भारतीय पर्यटक नेपाल आउन भैरहवा–भरतपुर उडान प्रभावकारी हुने बताउनुहुन्छ । देशका चार प्रमुख पर्यटकीय गन्तव्य उडान मार्फत जोडीदैं गर्दा पर्यटन प्रबर्धनमा सहयोग पुग्ने उहाँको भनाई छ । लुम्बिनिमा ठूलो संख्यामा पर्यटक आएर त्यहीबाट भारत तर्फ फर्कने गरेको भन्दै उहाँले ती पर्यटकलाई चितवन सहितका गन्तव्यहरुमा ल्याउन उडान महत्वपूर्ण हुने घिमिरे बताउनुहुन्छ । सडकको यात्रा गर्नु नपरे पछि छोटो समयमा धेरै ठाउँ घुम्न पाउने घिमिरेले बताउनुभयो ।
पर्यटन बिद डा. बिश्व सुवेदीले भैरहवामा अन्तर्राष्ट्रिय बिमानस्थल बनेकाले त्यहाँ संगको हवाई उडान चितवनका लागि निकै महत्वपूर्ण हुने बताउनुभयो । बिभिन्न देश संग उडानको सम्झौता भइसकेको भन्दै उहाँले यहाँका लागि निकट अन्तराष्ट्रिय बिमानस्थल भैरहवा हुने विश्वास व्यक्त गर्नुभयो । विश्वमा एक अर्ब भन्दा वढि बौदिष्ट भएको भन्दै उहाँले उनीहरुको पहिलो गन्तव्य लुम्बिनि रहेको जानकारी दिनुभयो । जसका कारण त्यहाँ संगको चितवनको सम्बन्ध महत्वपूर्ण हुने सुवेदीको भनाई छ ।
चितवन जंगल सफारीका लागि देशकै पहिलो गन्तव्य हो । यहाँको चितवन राष्ट्रिय निकुञ्ज र मध्यवर्ती वनहरुमा जंगल सफारी गर्न पर्यटक आउने गर्दछन् । एक सिंगे गैंडा, पाटेबाघ, घडीयाल गोही, चराचुरुङ्गी पर्यटकको रोजाइमा पर्ने गर्दछन् ।