चितवन / प्रेस चौतारी नेपाल जिल्ला शाखा चितवनले देवघाटको देवघाट समाज कल्याण केन्द्र वृद्धाश्रममा आश्रित ४० जना वृद्धवृद्धालाई दर खुवाएका छन् । हरितालिका तीजको अवसर पारेर प्रेस चौतारीले परिवारबाट अपहेलित भएर आश्रम रहेका ती वृद्धवृद्धालाई बुधबार दर खुवाएका हुन् ।
कार्यक्रमका प्रमुख अतिथि देवघाट गाउँपालिकाका अध्यक्ष दुर्गबहादुर थापाले देवघाटका वृद्धवृद्धालाई छोराछोरी जस्तैं बनेर सम्झिएर दर खुवाउने कार्यक्रम गरेकोमा आभार व्यक्त गरे । देवघाटको सरकारी आश्रमलाई वार्षिक नियमित पूँजीगत बजेटका लागि नीतिगत निर्णय गर्ने उनको भनाइ थियो ।
देवघाट क्षेत्र विकास समितिका अध्यक्ष बद्रि अधिकारीले सामाजिक उत्तरदायित्व र सेवा भावले ओतप्रोत भएर आश्रममा रहेका बुबा आमालाई चाडपर्वको बेलामा सम्झिएर दर खुवाउने कार्यक्रम गरेको खुसी व्यक्त गरे ।
देवघाट क्षेत्र विकास समितिका कार्यकारी निर्देशक तथा आश्रमका अध्यक्ष धिरनबाबु घिमिरेले आश्रममा आश्रित बुवाआमालाई बिहान बेलुका खाना खुवाउन दाताकै भरपर्नुपर्ने दुःखद अवस्था भएको बताउँदै यस रचात्मक र सिर्जनशील कामका लागि धन्यवाद दिए ।
प्रेस चौतारी नेपाल बागमती प्रदेश कमिटी सह–संयोजक शिशिर सिम्खडाले चाडपर्वका बेलामा आश्रमका बुवाआमालाई बितेको बेलाको याद बढी आउने भएकोले छोराछोरी बनेर सम्झना दिलाउन दर खुवाउने कार्यक्रम लिएर आश्रम आएको बताए ।
प्रेस चौतारी चितवनका अध्यक्ष सुवास पण्डितको अध्यक्षतामा भएको थियो ।
कालिका नगरपालिका वडा नं. ६ स्थाई घर भई हाल बालाजु, काठमाण्डौं बस्ने विकास बन्जरा र सविना बन्जराले छोरी साधना बञ्जराको गत भदौ २१ गते परेको प्रथम जन्मोत्सवको अवसरमा सो दर खुवाउने कार्यक्रममा आर्थिक सहयोग गरेका हुन् ।
- ADVERTISEMENT -
