मौसममा क्रमिक सुधार, दिउँसो पारिलो घाम लाग्ने – मौसमविद्

काठमाडौँ / देशभरको मौसम क्रमिक रुपमा सुधार हुँदै जाने जल तथा मौसम पूर्वानुमान महाशाखाले जनाएको छ । पश्चिमी न्यून चापीय प्रणालीको प्रभावका कारण मंगलबार रातिदेखि नै काठमाडौँ उपत्यकासहित देशभर नै बदली तथा वर्षा र माथिल्लो पहाडी क्षेत्रमा हिमपात भएको थियो । तर अहिले मौसम सुधार हुने क्रममा रहेको महाशाखाले जनाएको हो ।
पश्चिम तथा मध्य क्षेत्रका अधिकांश भागमा मौसम सुधार हुँदै गएको र प्रदेश १ तथा लुम्बिनी प्रदेशमा पनि सुधार हुँदै जाने मौसमविद् मञ्जु बासीले बताइन् । उनले पश्चिमतिर मौसम सुधार भइसकेको र अहिले विशेषगरी लुम्बनी, प्रदेश एकमा प्रभाव छ, त्यो पनि सुधार हुँदै जाने बताइन् ।
उनले आज दिउँसो काठमाडौँ उपत्यकासहित देशका धेरै स्थानमा पारिलो घाम लाग्ने बताइन् । हालको मौसमी प्रणाली सुधार हुने क्रममा रहे पनि केही स्थानमा भने बदली तथा वर्षाको सम्भावना रहेको मौसमविद्को भनाइ छ ।
अहिले पश्चिमी न्यून चापीय प्रणाली र भारतको बिहार आसपासमा रहेको न्यून चापीय क्षेत्रको प्रभाव छ । हाल देशभर आंशिकदेखि सामान्य बदली रही थोरै स्थानमा वर्षा भैरहेको छ भने उच्च पहाडी तथा हिमाली भूभागका थोरै स्थानामा हल्का हिमपात भैरहेको छ ।
बिहीबार दिउँसो देशभर आंशिकदेखि सामान्य बदली रही पहाडी भूभागका थोरै स्थानमा हल्का वर्षा र उच्च पहाडी तथा हिमाली क्षेत्रका केही स्थानमा हल्कादेखि मध्यम हिमपातको सम्भावना रहेको मौसमविद्ले बताएका छन् ।
यस्तै राति पहाडी भूभागमा आंशिकदेखि सामान्य बदली र बाँकी भूभागमा आंशिक बदली रहनेछ । प्रदेश १, बागमती प्रदेश र गण्डकी प्रदेशका उच्च पहाडी तथा हिमाली क्षेत्रका थोरै स्थानमा हल्का हिमपातको पनि सम्भावना रहेको मौसमविद्ले बताएका छन् ।
देशभर चिसो बढ्ने क्रम जारी रहेकाले सतर्कता अपनाउन पनि मौसमविद्ले आग्रह गरेको छ ।