गठबन्धनको जीत सुनिश्चित छ – सहइन्चार्ज खनाल

चितवन / नेकपा एकीकृत समाजवादीका पोलिटब्यूरो सदस्य एवम् बागमती प्रदेश सह इन्चार्ज कृष्णप्रसाद खनालले गठबन्धनको जीत सुनिश्चित भएको बताए । भण्डारामा आयोजित गठबन्धनको आमसभामा खनालले गठबन्धनको जीत सुनिश्चित भएको बताएका हुन् ।
खनालले गठबन्धनका उमेदवारहरुलाई अग्रिम बधाई तथा शुभकामना व्यक्त गरे । विगतका कैयौं जीवन सडक संघर्षमा बिताइसकेको र अब समृद्धिको दिशातर्फ लाग्ने बेला आएको उनले बताए । जनताले अधिकारका लागि अब सडकमा जान नपर्ने उनको जिकिर थियो ।
जनताले ५ वर्षको लागि चुनेको अभिमत लत्याउँदै केपी ओलीले दुई पटक संसद विघटन गर्नु ठूलो भूल गरेको आरोप लगाए । संविधानको मर्म, भावना र रक्षाका लागि यो गठबन्धन बनेको उनले बताए ।
केपी प्रवृत्तिको विरुद्ध परास्त नहुन्जेलसम्म लडिने उनको भनाइ थियो । उनले गठबन्धनका उमेदवारले जनताको मत जितेको दावी गर्दै कम्तीमा ३० वर्षसम्म सामाजिक कार्यमा लगाउन सुझाव दिए । उनले गठबन्धनका उमेदवारले जनताको बीच बोलेको बोलीलाई पूरा गर्ने प्रतिबद्धता व्यक्त गरे ।
उनले एमालेले सीसाको घरमा बसेर अरुको घरमा ढुंगा हान्ने दुस्प्रयास गरेको तथा आगामी बैशाख ३० गते अर्काको घरमा ढुंगा हान्दा एमालेको सिसाको घर बाँकी नरहने चेतावनी समेत दिए ।