मुग्लिनमा एकाबिहानै सडक दुर्घटना, बाटो एकतर्फी सुचारु

चितवन / मुग्लिन नारायणगढ सडक खण्डमा दुई ट्रक एक आपसमा ठक्कर खाँदा एक जना चालक घाइते भएको छ । घाइते चालकको उपचारको लागि पुरानो मेडिकल कलेज पठाइएको चितवन जिल्ला प्रहरी प्रवक्ता नरहरि अधिकारीले जानकारी दिए ।
प्रवक्ता अधिकारीका अनुसार घाइते चालक झापा बुद्धशान्ती ३ बस्ने वर्ष ४० को मनोज धिमाल हो । उनको खुट्टामा चोट लागेको छ भने अवस्था मध्यम रहेको छ । घाइते धिमाल ना ६ ख ७८०४ नम्बरको ट्रकका चालक हुन् ।
आज (शनिबार) बिहान ५ बजेर ५५ मिनेट जाँदा ईच्छाकामना गा.पा.५ नारायणगढ मुग्लिन सडक खण्डको तीन नम्बर पुलमा दुर्घटना भएको हो । मुग्लिनबाट नारायणगढतर्फ गइरहेको ना६ख ७८०४ नम्बरको डिब्बा ट्रक र बिपरित दिशाबाट आइरहेको लु२ख ५६५४ नम्बरको ट्रक एक आपसमा ठक्कर खाएको हो ।
उक्त दुर्घटनाका कारण हाल बाटो एकतर्फी सुचारु रहेको अधिकारीले बताए । दुबै ट्रक घटनास्थलमा रहेको छ भने लु२ख ५६५४ नम्बरको ट्रक चालक नियन्त्रणमा लिइएको छ ।