चितवनमा ‘सुपर डान्सर नेपाल’ को अडिसन, ३ सय बढीको सहभागिता

चितवन । भारतको चर्चित रियालिटी शो सुपर डान्सर इन्डियाको फ्रेन्चाइज कार्यक्रम ‘सुपर डान्सर नेपाल’को अडिसन चितवनमा हुने भएको छ । भरतपुरस्थित स्टेप बाइ स्टेप स्कुलमा पर्सि सोमबार (जेठ २३ गते) ‘सुपर डान्सर नेपाल’को अडिसन हुने नृत्य निर्देशक संघ नेपाल (डिड्यान) चितवनका अध्यक्ष रेनु तामाङले जानकारी दिइन् ।
‘सुपर डान्स नेपाल’ एडी रिलिज र डान्स सिजन–२ का उपविजेता वाइल्ड रिप्रेज क्र्युको संयुक्त आयोजनामा काठमाडौंमा हुन लागेको हो । उक्त कार्यक्रममा जन्मदर्ताको आधारमा ४ वर्षदेखि १४ वर्षका बालबालिकाहरुले सहभागिता जनाउन सकिने अध्यक्ष तामाङले बताइन् ।
उनका अनुसार जिल्लामा छनोट भएका सबै प्रतिस्पर्धीहरुलाई काठमाडौं टिभी राउण्डमा लैजाने र बस्ने, खाने सबै आयोजकले उपलब्ध गराउने छ । आज शनिबारसम्म २ सय ५० जनाले फर्म भरिसकेको र ३ सय बढी बालबालिका सहभागी हुने अनुमान गरिएको छ ।
नेपाल अधिराज्यभर ६ ठाउँमा (पोखरा, इटहरि, हेटौंडा, बुटवल, नेपालगंज र काठमाडौं) हुने अडिसन जेठ २३ गते एकै दिन चितवन र बुटवलमा हुँदैछ । डिड्यानको शाखा हेटौंडामा स्थापना नभएकोले चितवनलाई केन्द्र बनाएर अडिसन हुन लागेको अध्यक्ष तामाङले भनिन् । जिल्ला चितवन मुख्य अडिसन क्षेत्र रहेको र मनहरि, हेटौंडा, नवलपुरका सबै बालबालिकाहरुले भाग लिन पाउने छन् ।
नृत्य निर्देशक संघ नेपाल चितवनको सहयोगमा उक्त अडिसन कार्यक्रम हुन लागेको हो भने कान्तिपुर टेलिभिजनबाट प्रत्यक्ष प्रसारण हुँदैछ । कार्यक्रममा आफ्ना बालबालिकाहरुलाई सहभागी गराई प्रतिभा प्रदर्शन गर्न र यस अमूल्य अवसरका लागि सहयोग गरी दिनुहुन सबै अभिभावकहरुलाई उनले आग्रह गरेकी छिन् ।