चितवन / देशकै उत्कृष्ट एवम् विश्वमा परिचित चितवन राष्ट्रिय निकुञ्ज घुम्ने पर्यटकको संख्यामा बृद्धि भएको छ । कोरोना महामारीले थला परेको पर्यटन क्षेत्र कोरोनाको असर कम हुँदै जाँदा पर्यटक आगामन बढेको हो ।
चितवन राष्ट्रिय निकुञ्जका सूचना अधिकारी गणेश तिवारीले दिनुभएको गत आर्थिक वर्ष २०७८÷०७९ को तथ्याङ्क अनुसार १ लाख ९० हजार ४५८ जनाले निकुञ्ज घुमेका हुन् ।
- ADVERTISEMENT -
जसमा विदेशी पर्यटक मात्रै १४ हजार ८०८ जना छन् । ८ हजार २८ पुरुष र ६ हजार ७८० जना महिलाले चितवन राष्ट्रिय निकुञ्ज घुमेका हुन् । त्यस्तै सार्क मुलुकबाट १९ हजार ९७९ जना पर्यटकले निकुञ्ज घुमेका छन् । १० हजार ८४९ जना पुरुष र ९ हजार १३० जना महिला छन् ।
त्यस्तै सवैभन्दा धेरै आन्तरिक पर्यटकले विश्व सम्पदा सूचीमा रहेको निकुञ्ज घुमेका छन् । तथ्याङ्क अनुसार १ लाख ५५ हजार ६७१ जना आन्तरिक पर्यटकले निकुञ्ज घुमेका छन् । जसमा ८० हजार ३९४ पुरुष र ७५ हजार २७७ जना महिला रहेका छन् ।
१२ महिनामध्ये सवैभन्दा धेरै पर्यटक बैशाख महिनामा आएका छन् । जहाँ आन्तरिक सहित सवै देशका गरेर २५ हजार ३३९ जनाले निकुञ्ज घुमेका छन् भने सवैभन्दा थोरै संख्यामा आएका पर्यटक श्रावणमा रहेको छ । जम्मा १ हजार ९०६ जनाले मात्रै निकुञ्ज घुमेका थिए ।
कोरोना महामारी पछि थलिएको पर्यटन क्षेत्रलाई माथि उठाउन आन्तरिक पर्यटकले ठूलो भूमिका खेलेका छन् । तथ्याङ्क अनुसार आर्थिक वर्षको सुरुवातमै १ हजार ८४९ आन्तरिक पर्यटकले निकुञ्ज घुमेका थिए जवकी सो समय सार्कका ३७ जना र विदेशी २० जना थिए ।
त्यसपछिका महिनामा पनि आन्तरिक पर्यटकको संख्या बढ्दै गएको देखिन्छ । कोरोनाले घरमै थुनिएर वस्न वाध्य उनीहरु खुकुलो भएसँगै निकुञ्जमा घुमेर रमाउन थालेका थिए ।
यसरी भएको पर्यटक आगमनका कारण निकुञ्जले गत आर्थिक वर्षमा मात्रै पर्यटन शुल्कबाट ७ करोड २९ लाख ४५ हजार ६५० रुपैयाँ आम्दानी गर्न सफल भएको छ । सवैभन्दा धेरै वैशाख महिनामा १ करोड ४१ लाख ९१ हजार आम्दानी गरेको छ ।
त्यस्तै निकुञ्जले ती पर्यटकले गरेको जीप सफारीबाट २ करोड ७८ लाख ८० हजार आम्दानी गरेको छ । आर्थिक वर्षको सुरु श्रावण र भदौमा शुन्य जीप सफारी रहेको निकुञ्जमा असोजबाट जीप सफारी सुरु भएको थियो । जीप सफारी भएको सुरु महिनामा ९ लाख आम्दानी भएको छ ।
निकुञ्जमा विश्वमै दुर्लभ एक सिङ्गे गैँडा, बाघ, हात्ती, चितुवा, विभिन्न प्रजातिका चराचुरुङ्गी, गोही, अर्ना लगायतका जनावर हेर्न पाइन्छ ।
