चितवनमा २८ औं तामाङ प्रसारण दिवस मनाइँदै, गुम्बालाई खाद्यान्न सहयोग गरिने

–सन्तोष तामाङ
चितवन । तामाङ पत्रकार संघ चितवनले आज (बुधबार) ‘२८औं तामाङ प्रसारण दिवस’ मनाउँदै छ । भरतपुर ७ टाइगरचोक स्थित लामा पाठशालालाई खाद्यन्न सहयोग गरी तामाङ प्रसारण दिवस मनाउन लागिएको संघका अध्यक्ष बबिलाल तामाङले जानकारी दिए ।
अध्यक्ष तामाङका अनुसार देशैभर रहेका तामाङ पत्रकार संघ जिल्ला शाखाहरुले हरेक वर्ष भदौ १ गते तामाङ प्रसारण दिवस मनाउँदै आइरहेको छ । यस वर्षको तामाङ प्रसारण दिवसमा सामाजिक कार्यलाई प्राथमिकता दिने सोच अनुसार लामा पाठशालामा अध्ययनरत विद्यार्थीहरुलाई खाद्यन्न सहयोग गर्न लागिएको उनको भनाइ छ ।
विसं. २०५१ साल भदौ १ गते रेडियो नेपालमा पहिलो पटक तामाङ भाषामा समाचार प्रसारण भएको थियो । अमृत योन्जन तामाङ, ध्यानबहादुर मोक्तान र रमिता बल तामाङ सहभागी समाचार टोलीले ‘चु रेडियो हिन्ला, दाम तामाङरि साङ्युर सान्स्युगो’ भनेर तामाङ भाषामा समाचार प्रसारण गरेका हुन् ।
सोही दिनदेखि हरेक वर्ष तामाङ संचारकर्मी तथा तामाङ समुदायले तामाङ प्रसारण दिवसको रुपमा मनाउँदै आएको छ । तामाङ संचारकर्मीहरुले तामाङको पहिचान, अधिकार र जनचेतनाका लागि रेडियो, पत्रपत्रिका, टेलिभिजन तथा अनलाइनबाट सकारात्मक परिवर्तनका आवाज उठाउँदै आएका छन् ।
संघले प्रत्येक वर्ष तामाङ प्रसारण दिवस मनाउँदै आएकोमा गत वर्ष कोभिड १९ का कारण स्थगित गरेको थियो । तामाङ भाषासम्बन्धी शिक्षालाई मध्यनगर गर्दै निकट भविष्यमा तामाङ भाषा प्रशिक्षण कार्यक्रम ल्याउने तयारी गरिरहेको संघले जनाएको छ ।