एकैदिन ५४० जनामा डेंगु संक्रमण, मकवानपुरमा मात्रै ११२ जना

काठमाडौं / नेपालमा एकै दिन ५४० जना डेंगु संक्रमित थपिएका छन् । डेंगु संक्रमणबाट आजै २ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
योसँगै साउन यता डेंगुबाट मृत्यु हुनेको संख्या ३८ पुगेको स्वास्थ्य तथा जनसंख्या मन्त्रालयले जनाएको छ ।
मन्त्रालयको पछिल्लो तथ्यांक अनुसार, साउनयता २८ हजार १०९ जनामा डेंगु संक्रमण भइसकेको छ । हाल मुस्ताङबाहेक सबै जिल्लामा संक्रमितको बिरामी देखिएका छन् ।
स्वास्थ्य मन्त्रालयको तथ्यांक अनुसार सबैभन्दा बढी बागमती प्रदेशमा २१ हजार ९७५, लुम्बिनीमा प्रदेशमा ३ हजार १२५, सुदूरपश्चिम प्रदेशमा ८५० जना, गण्डकीमा ६ सय ७७ जना, मधेश प्रदेशमा ४१३ जना र कर्णाली प्रदेशमा २३८ जनामा संक्रमण देखिएको छ ।
मकवानपुरमा मात्रै ११२ जना डेंगु संक्रमित
यसैबीच मकवानपुरमा पछिल्लो २४ घण्टामा थप ११२ जनामा डेंगु संक्रमण पुष्टि भएको छ । पुष्टि हुनेहरुमा सबैभन्दा धेरै हेटौंडा उपमहानगरपालिकाका रहेका छन् । त्यहाँ ९४ जनामा डेंगु संक्रमण पुष्टि भएको स्वास्थ्य कार्यालय मकवानपुरले जनाएको छ ।
यसैगरी, मकवानपुरगढी गाउँपालिकाका १ जना, मनहरी गाउँपालिकाका ४ जना र भीमफेदी गाउँपालिकाका १ जनामा डेंगु संक्रमण पुष्टि भएको हो ।
यससँगै जिल्लामा डेंगु संक्रमितको कुल संख्या २ हजार ८७६ जना पुगेको छ । जसमध्ये १ हजार ६१३ जना पुरुष र १ हजार २६३ जना महिला रहेका छन् ।
जिल्ला उक्त संक्रमणका कारण एक जनाको मृत्यु भएको स्वास्थ्य कार्यालय मकवानपुरले जनाएको छ ।