–सन्तोष तामाङ
चितवन । चितवनलगायत देशैभर राजनैतिक दलहरुको चुनावी माहोल निकै तातिएको छ । दलहरु मतदाताहरुसँग भोट माग्न उनीहरुकै घरदैलो पुग्ने गरेको छ । दलहरु यतिखेर जीत आफ्नो पोल्टामा पार्नका लागि रस्साकस्सी नै गरिरहेको छ ।
यसैबीच, उग्र्यान न्हुर्बु छ्योलिङ गुम्बा नारायणपुरमा नेकपा एमालेले चुनावी कार्यक्रम गरेको छ । कार्यक्रमका प्रमुख अतिथि तथा प्रतिनिधि सभा सदस्यका उमेदवार देवी ज्ञवालीले नेकपा एमाले देशको लागि योगदान दिने ठूलो पार्टी भएको बताए ।
कार्यक्रममा बोल्दै ज्ञवालीले एमालेलाई जिताउन आग्रह गर्दै प्रत्येक घरधुरीलाई १० हजार लिटर पानी निःशुल्क गरिने प्रतिबद्धता व्यक्त गरे । उनले ५० युनिटसम्म बिजुली निःशुल्क गर्ने र महिलाको स्वास्थ्यसम्बन्धी सेवालाई विशेष प्राथमिकता राख्ने बताए ।
यस्तै चितवन क्षेत्र नं. २ का प्रतिनिधि सभा सदस्य पदका उमेवदवार कृष्णभक्त पोख्रेलले गुम्बामा रहेको अधुरो योजनालाई पूरा गर्ने बताए । गुम्बाका लागि पहिले पनि योगदान दिँदै आएको उनको भनाइ थियो भने आगामी दिनमा अझै निरन्तरता दिने जिकिर गरे ।
उनले महिला स्वास्थ्यलाई विशेष प्राथमिकता राखेर सुत्केरी महिलाको निःशुल्क सेवा उपलब्ध गराउने बताए ।
गुम्बाका अध्यक्ष आसमान तामाङले दाताहरुको सहयोगबाट नै गुम्बाको स्तरबृद्धि भएको बताए । अध्यक्ष तामाङले गुम्बाका अधुरो योजना पूरा गर्न अझै पनि दाताहरुको आवश्यकता भएकोले सबैलाई सहयोगको लागि अपिल समेत गरे ।
कार्यक्रममा पूर्व वडाध्यक्ष पदम पाणी सुवेदी, गुम्बाका प्रमुख लामा पेमा वाङ्छु, पुरुषोत्तम नेउपाने, सुनिता अधिकारी, बिमल पौडेल, पुर्णकान्त कोइराला, शुश्मा तामाङलगायतको उपस्थिति रहेको थियो ।
कार्यक्रम गुम्बाका अध्यक्ष आसमान तामाङको अध्यक्षतामा सम्पन्न भएको थियो भने जंगबहादुर तामाङले संचालन गरेको थियो ।
- ADVERTISEMENT -
