विश्वकप फुटबल : आजदेखि सुरु, ३२ राष्ट्रको सहभागिता (टाइसिट सहित)

चितवन / फुटबल प्रेमीहरुको बहुप्रतिक्षित विश्व फुटबलको महाकुम्भ विश्वकप फुटबल २०२२ आज (आइतबार) देखि कतारमा सुरु हुँदैछ । सधैंजसो वर्षायाममा हुने विश्वकप फुटबल यसपटक कोभिड १९ का कारण ६ महिना पछाडि धकेलिएको हो ।
कतारमा हुने उक्त विश्वकप एक महिनासम्म चल्नेछ भने साविक विजेता फ्रान्ससहित ३२ राष्ट्रको सहभागिता रहेको छ । सहभागी ३२ टोलीलाई आठ समूहमा विभाजन गरिएको छ ।
विश्वकप फुटबल २०२२ को औपचारिक उद्घाटन समारोह अल बायत रंगशालामा आयोजना हुँदैछ जुन कतारको राजधानी दोहाबाट ४० किलोमिटरको दूरीमा रहेको छ ।
उक्त रंगशालामा ६० हजार क्षमताको रहेको छ भने विभिन्न देशका चर्चित कलाकारहरूले आफ्नो प्रस्तुति दिने भएका छन् । उद्घाटन समारोहमा दक्षिण कोरियाको रक ब्यान्ड बीटीएसका सात सदस्यमध्येका जंग कुकले आफ्नो प्रस्तुति दिने कार्यक्रम छ ।
यस्तै कोलम्बियाकी रक स्टार साकिरा, जे बल्विन, साँगीतिक समूह ब्ल्याक आइड पिज, रोवि विलियम्स, लिल बेबी र भारतीय अभिनेत्री नोरा फतेहीले पनि उद्घाटन समारोहमा आफ्नो प्रस्तुति दिने छन् ।
फिफा विश्वकप फुटबल आयोजक कतारले विश्वकप अवधिभर रंगशाला वरपर मदिरा बिक्रीमा प्रतिबन्ध लगाएको छ । तर, अल्कोहलमुक्त बियर भने विश्वकपको ६४ वटै खेलमा रंगशालामा बिक्री गरिने जनाएको छ ।
उद्घाटन खेलमा आयोजक कतार र इक्वेडरले प्रतिस्पर्धा गर्दै छन् । कतार आयोजकका नाताले पहिलो पटक विश्वकप फुटबल खेल्दैछ भने इक्वेडरको भने चौथो सहभागिता हो । सन् २०१९ मा एएफसी एसियन कपको विजेता बन्नु नै कतारको अहिलेसम्मकै ठूलो सफलता हो। एसियाको पावर हाउस जापानलाई हराउँदै एसियन कपको उपाधि जितेको थियो ।
विश्व प्रसिद्ध अस्पाएर एकेडेमीबाट खेलाडी उत्पादन थालेको कतारले स्पेनिस प्रशिक्षक फेलिक्स सान्चेजको नेतृत्वमा उच्च प्रदर्शन गरिरहेको छ । समूह ‘ए’मा इक्वेडर, नेदरल्यान्ड्स र सेनेगलविरुद्ध टोलीको आक्रमणभन्दा डिफेन्सको परीक्षा धेरै हुनेछ ।

- ADVERTISEMENT -