स्पेनलाई हराउँदै जापान विश्वकपको अन्तिम १६ मा प्रवेश

काठमाडौं / कतार जारी विश्वकप फुटबल खेलको अन्तिम १६ मा जापान प्रवेश गरेको छ । बिहीबार राति भएको खेलमा जापानले स्पेनलाई २–१ गोलअन्तरले पराजित गर्दै अन्तिम १६ मा प्रवेश गरेको हो । रोमाञ्चक र सनसनीपूर्ण खेलमा जित निकाल्दै एसियाली महारथी जापान समूह विजेताका रुपमा फिफा विश्वकप फुटबलको अन्तिम १६ मा प्रवेश गरेको हो ।
यससँगै स्पेनसँग पछि परेको स्थितिलाई उल्टाएर जित निकाल्दा जापान समूह ई को विजेतासमेत बनेको छ । जापानले समूहमा पूर्व विश्व च्याम्पियनहरु स्पेन र जर्मनी दुवैलाई हराएको थियो भने कोष्टारिकासँग हार बेहोरेको थियो ।
६ अंकसहित समूह विजेता बनेको जापानले समूह एफको उपविजेता क्रोएसियासँग क्वाटरफाइनल प्रवेशका लागि खेल्नेछ । उपविजेता स्पेनले भने सो समूहको विजेता मोरक्कोसँग खेल्नेछ ।
खालिफा अन्तर्राष्ट्रिय रंगशालामा भएको खेलको ११औं मिनेटमै अल्भारो मोराटाले गरेको गोलबाट पछि परेको जापान पहिलो हाफमा पूर्णतया स्पेनको छायाँमै थियो ।
दोस्रो हाफमा स्पेनको टिकिटाकामाथि हावी देखिएको जापानले सुरुवाती ६ मिनेटमै २ गोल फर्काउन सक्यो । ४८औं मिनेटमा रित्सु डोआन र त्यसको तीन मिनेटपछि आओ तानाकाले गोल गरेपछि जापान खेलमा फर्कियो ।