इच्छाकामना गाउँपालिकाले १५ वेडको अस्पताल सुरु गर्ने

चितवन / चितवनको इच्छाकामना गाउँपालिकाले १५ बेडको अस्पताल सेवा सुरु गर्ने भएको छ । गाउँपालिकाले हालका लागि गाउँपालिका प्राङ्गणमै निर्माण गरिएको टहराबाट अस्पतालको सेवा सुरु गर्न लागेको हो।
अस्पताल संचालनका लागि अहिले प्रविधि जडान, सामाग्रीहरु मिलाउने, उपचार कक्षहरु तयार गर्ने काम भैरहेको गाउँपालिका अध्यक्ष दानबहादुर गुरुङले जानकारी दिए । उनका अनुसार छिटोमा मंसिर मसान्त भित्र ढिलोमा पुसको दोस्रो हप्ता भित्रमा अस्पतालको सेवा संचालनमा आउनेछ ।
अस्पतालको सेवा संचालनमा आएसँगै स्थानीय नागरिकहरु सामान्य उपचारको लागि पनि पालिका भन्दा बाहिरका निजि अस्पतालहरुमा जानुपर्ने बाध्यताको अन्त्य हुने अध्यक्ष गुरुङले बताए । उनले भने ‘अस्पतालको सेवा संचालनका लागि हामीले जेठमै कार्यपालिका बैठक बसेर निर्णय गरेको थियो, सोही अनुरुप अस्पतालको सेवा संचालनको अन्तिम तयारीमा छौं’ ।
अस्पताल संचालनको लागि इच्छाकामना गाउँपालिकाको विशेष आग्रहमा नेपाल कम्युनिष्ट पार्टी एकिकृत समाजवादीका जिल्ला नेता नरेन्द्र कङ्दङ्वा सहितको टोलीले स्वास्थ्य तथा जनसंख्या मन्त्री भवानी खापुङसँग केहि महिना पहिले भेटवार्ता गरि गाउँपालिकाको लागि विशेष सक्रियता देखाई ३६ लाख मुल्य बराबरको नयाँ डिजिटल एक्स–रे मेसिन, बेड, मोनिटर र केहि औषधीहरु लगायत ५० लाख बराबरको स्वास्थ्य सामाग्री उपलब्ध गराईएको थियो ।
बुधबार मात्रै प्राविधिक टोलीले एक्स–रे मेसिन जडान गरी सेवा सुरु गरेको छ । थप स्वास्थ्य सेवाहरु पनि चाडै सुुरु गर्ने गरि काम भैरहेको गाउँपालिकाका स्वास्थ्य शाखा प्रमुख बासुदेव सापकोटाले जानकारी दिए ।