चितवनमा माघको पहिलो सातादेखि ‘दोश्रो खैरहनी महोत्सव’

चितवन / चितवनमा ‘बागमती प्रादेशिक एवम् दोश्रो खैरहनी महोत्सव २०७९’ हुने भएको छ । नेपाल उद्योग वाणिज्य महासंघ बागमती प्रदेश र उद्योग वाणिज्य संघ खैरहनीको संयुक्त आयोजनामा खैरहनी–२ स्थित लदरी खोला किनारमा बागमती प्रादेशिक एवम् दोस्रो खैरहनी महोत्सव हुन गइरहेको बिहीबार प्रेस सम्मेलन मार्फत जानकारी गराइएको हो ।
खैरहनी उद्योग वाणिज्य संघका अध्यक्ष दिपेन श्रेष्ठले माघ ४ गतेदेखि १५ गतेसम्म दोस्रो संस्करणको महोत्सव हुन लागेको जानकारी दिए । प्रदेशको उद्योग व्यापार क्षेत्रको विकास गरी देशकै आर्थिक विकासमा टेवा पु¥याउने उद्देश्यले महोत्सव आयोजना गरिएको श्रेष्ठले बताए ।
अध्यक्ष श्रेष्ठले उद्योग वाणिज्य संघ खैरहनीका सदस्यहरुलाई स्टलमा १० प्रतिशत छुट र स्टलको ९ हजार देखि ३० हजारसम्म शुल्क लिने बताए । महोत्सवमा विभिन्न क्षेत्रहरु उद्योग, व्यापार, कृषि, सूचना प्रविधि, पर्यटन, अटो, होटल, शैक्षिक संस्था, सरकारी, गैरसरकारी संघसंस्था, महिला उत्पादन तथा सेवाहरु गरी ३५० वटा स्टलहरु रहने जानकारी दिएको छ ।
करिब एक करोड बीस लाखको लगानीमा हुन लागेको महोत्सवमा तीन लाख दर्शकले अवलोकन गर्ने अनुमान गरिएको छ । यस बृहत महोत्सवमा सवारी साधनहरुसहित गरी करिब ७० करोड बराबरको कारोबार हुने अपेक्षा आयोजकले गरेको छ ।
महोत्सवमा बहुर्राष्ट्रिय, राष्ट्रिय तथा लघु घरेलु तथा साना उद्योगहरुका उत्पादनहरु, कृषि उत्पादनहरु, महिला उद्यमीबाट उत्पादित सामग्रीहरु, बालउद्यान, सवारीसाधनलगायत प्रदर्शनी हुनेछ । उद्योगी र उपभोक्ताहरुको सोझो सम्पर्कको स्थापना गराई व्यवसाय वृद्धि गर्ने, उत्पादित वस्तुहरुको बजार प्रवद्र्धन र गुणात्मक प्रतिस्पर्धाको विकास गर्ने, उद्योगीहरुको समस्या, अवसर र चुनौतीबारे अन्तरक्रिया गर्ने महोत्सवको लक्ष्य तथा उद्देश्य रहेको छ ।
महोत्सवले औद्योगिक पर्यटनलाई बढावा दिनुका साथै सूचना र प्रविधिको आदानप्रदान गर्दै कृषकहरुलाई कृषि उपजको विषयमा जानकारी प्रदान गर्ने आयोजकको भनाइ छ । महोत्सवको विशेष आर्कषणको रुपमा विभिन्न जनजातिको स्थानीय भेषभुषामा सांस्कृतिक कार्यक्रमका साथै स्थानीय तथा राष्ट्रिय कलाकारहरुको मनोरञ्जनात्मक प्रस्तुति रहनेछन् ।
महोत्सवमा प्रवेश शुल्क ५०, विद्यार्थीहरुलाई ३० र राज्यले सम्मान गरिएको ज्येष्ठ नागरिकलाई टिकट निःशुल्क गरिने छ । यसअघि विसं २०७५ साल मंसिरमा पहिलो पटक महोत्सव आयोजना गरिएको थियो ।