चितवनको जिल्ला प्रशासनमा सेवाग्राहीलाई ‘टाइम कार्ड’

चितवन / जिल्ला प्रशासन कार्यालय चितवनले सेवाग्राहीका लागि ‘टाईम कार्ड’ लागू गर्ने भएको छ । प्रशासनमा सेवाग्राहीहरुको भिडभाड हुन थालेपछि भोलि (आईतबार)बाट ‘टाईम कार्ड’ लागू हुने भएको हो ।
‘टाईम कार्ड’ लागू भएपछि सेवाग्राहीलाई तोकिएको समयसीमा भित्र सेवा नदिने जिम्मेवार कर्मचारीबाट सेवाग्राहीलाई क्षतीपूर्ती भरण गराइने भएको हो । कर्मचारीहरुलाई सेवाप्रति जिम्मेवार बनाउन ‘टाईम कार्ड’ लागू गर्न लागिएको हो ।
प्रमुख जिल्ला अधिकारी अस्मान तामाङका अनुसार कार्यालयबाट दिइने सेवाहरुमा सेवाग्राहीलाई ‘टाईम कार्ड’ को व्यवस्था गर्न लागिएको हो । उनका अनुसार राष्ट्रिय परिचय पत्र, राहदानी, नागरिकता र प्रतिलिपि शाखा, मुद्दा शाखा लगायतका शाखामा ‘टाईम कार्ड’ लागू गर्ने तयारी गरिएको छ ।
पछिल्लो समय कार्यालयमा भिडभाड बढेकाले ‘टाईम कार्ड’ लागू गरिएको उनले बताए । सेवाग्राहीलाई सहज बनाउनका लागि कार्यालय परिसरमा हेल्प डेक्स राखिने छ जहाँबाट आवश्यक कागजपत्र पूरा भए नभएको हेरेर सेवाग्राहीलाई सेवाका लागि पठाइने प्रजिअ तामाङले बताए ।
कागजपत्र पूरा भएका सेवाग्राहीलाई मात्र ‘टाईम कार्ड’ दिइने छ । जसले गर्दा कार्यालयमा अनावश्यक भिड नियन्त्रण हुने उनको भनाई छ । राष्ट्रिय परिचयपत्रका लागि प्रतिघण्टा ३० जना, राहदानीमा प्रतिघण्टा २० जना र नागरिकता एवं प्रतिलिपी सेवाग्राहीको कागजपत्रका आधारमा एक घण्टाभित्र उपलव्ध गराउने गरी ‘टाईम कार्ड’ दिन लागिएको हो ।
सेवा लिन आएका सेवाग्राहीहरुलाई तोकिएको समयमा सेवा दिइने छ । अहिले कार्यालयबाट दैनिक रुपमा राष्ट्रिय परिचय पत्र १९० जना, नागरिकता १५० जना, राहदानी १३० जनाले सेवा लिने गरेका छन् । नागरिकता नयाँ बनाउने ८० जना र प्रतिलिपी लिने ७० जना हुने गरेको उनले बताए ।