यतीको विमान दुर्घटनाग्रस्त, ३६ को शव निकालियो

काठमाडौं / यती एयरलाइन्सको ९एन एएनसी एटीआर ७२ जहाज पोखरामा आज (आइतबार) दुर्घटनाग्रस्त भएको छ । काठमाडौंबाट ६८ जना यात्रु र चालक दलका चार जना सदस्य लिएर पोखराका लागि उडेको यती एयरलाइन्सको ९एन एएनसी एटीआर ७२ जहाज पोखरामा दुर्घटनाग्रस्त भएको हो ।
उक्त दुर्घटनामा ३६ जनाको शव निकालिएको बताइएको छ । उद्धार कार्यमा खटिएका सुरक्षा स्रोतकाअनुसार ११ बजेर ३० मिनेट जाँदासम्म दुर्घटनास्थलबाट ३६ जनाको शव निकालिएको हो ।
पोखराको पुरानो विमानस्थलको पछाडिपट्टि रहेको सेती नदी दोभानमा जहाज खसेको थियो । जहाज क्याप्टेन कमल केसीले उडाएका थिए ।
पोखराको सेती खोंचमा दुर्घटनाग्रस्त भएको जहाजमा आगो लागेको छ । आगो निभाउने प्रयास भइरहेको यती एयरलाइन्सका प्रवक्ता सुदर्शन बर्तौलाले जानकारी गराए ।